Hondartzaren zaintza: soinu sistema berri-berria

Maiatzaren 8 asteazken honetatik goiti, Herriak hari gabeko bozgorailuen sistema berria emanen du abian hondartzaren luzera guztia hartzen duen komunikazio eta prebentzio zerbitzua emateko.

Lehen aldi batean, baliabide hori Hondarraitz hondartzaren alde nagusian zabalduko da, eta Dunba Harrien aldera uztailaren lehenetik goiti hedatuko da, hau da, zaintza sasoiaren haste egunean bertan.

Bozgorailuak zerbitzu teknikoek Zokoburuko digatik Dunba Harrietaraino banaturik kokatu dituzten 8 mastatan kokatuak dira. Sistema moderno horrek erabileren kudeaketa errazten du informazio edota prebentzio mezuak hedatzeko aukera ematen baitu.

Hiru postuburuek sistema horren ezagutzeko formakuntza egin dute apirilaren 30ean eta oso harrera ona egin diote teknologia horri, aukera ederra iruditu baitzaie eta egiazko laguntza dituzten egiteko guztietarako. SDIS 64 delakoaren hondartzarako erreferente denak ere goraipatu du baliabide hori, formakuntza egun horretan hantxe baitzen. Txabik, postuburuetako batek, honela erran du: «aitzinamendu nabarmena zaigu alerta eta prebentzio lanetan gure hondartza luze-luzerako. Sokorri zerbitzuentzat denbora irabazteko aukera da; zaintzan ematen dugun denbora optimizatzeko aukera ematen digu… Engoitik, hondartzaren 3 kilometroak mezu bakarrarekin estali ditzakegu galdu den haur bat atzemateko, adibidez, hainbat sokorri emaile txilibito eta irratiekin han-hemenka ibilarazi ordez. Segurtasunerako aitzinamendu handia da».

Izarian erabiltzea

Apirilaren 30eko jardunaldia soinu sistemaren entseatzeko erabili da ere eta doiketak egiteko, eta horrek auzokoak eta paseatzaileak harritu ditu. «Zentzuz erabiliko dugu sistema hori», dio Frédéric Tranche segurtasun auzapezordeak, eta azpimarratu du «prebentzioa eta segurtasuna lehentasun-lehentasunekoak direla gure hondartzarako, euskal kostaldeko luzeena baita eta batez ere familiak etortzen baitira». Halatan, bada, bozgorailuak hondartzaren zaintza aldiaren hastea eta bukatzea jakitera emateko erabiliko dira, larrialdietako mezuak hedatzeko (helikoptero bat datorrela, haurrak galdu direla), eta, muga gehiagorekin, jendeak herritartasun arau zenbaitetaz ohartarazteko (hondartzan erretzeko edota zakurrak sartzeko debekua).

Formakuntza hori Eco Alfa espainiar sozietateak eman du; hondartza megafonian espezialdua da eta Herriak hautatu du urtean 14 000 €ko alokairu kostu baten ordainez.

Kotte Ecenarro auzapezak segurtasun alorrean, informazio alorrean eta hondartzako harrera alorrean egin aitzinamendua goraipatu du. Baliabidea zaintza sasoia bururatu arte izanen da lanean, hau da, Omiasaindu oporrak arte. Aldi horretan, sokorri guneak zabalik ez direnean ere erabiltzeko asmoa dugu hondartza inguruan eragin lezakeen klima gertakari zeinahiren berri emateko».

Hendaia halako baliabidea eskuratzen duen Akitaniako itsas bazterreko lehen herria bihurtzen da, horrenbestez, eta hondartzen kudeaketan eta segurtasunean urrats erabakigarria egiten du horrela.