HERRIKO KONTSEILUA – 2025eko otsailaren 26ko bilkura

KE.RS – 044.2025

2025eko otsailaren 19an herriko hautetsiei banaka igorri deialdien bitartez, Herriko Kontseilua bilkura arruntean biltzera da deitua, 2025eko otsailaren 26an, asteazkenarekin, 18:30ean.

2025eko otsailaren 26 asteazkeneko bilkura, 18:30ean

GAI ZERRENDA

I – 2025EKO URTARRILAREN 22KO HERRI KONTSEILUAREN BILKURA AGIRIA ONARTZEA

II – DELIBERAMENDUAK
Txostengilea: Kotte ECENARRO j.

011.2025 – Herriko Kontseiluak emandako ahalmen ordezkaritzaz auzapezak hartu erabakiak

012.2025 – 2025eko Aurrekontu Orientabideen Eztabaida

Txostengilea: Frédéric TRANCHE j.

013.2025 –  Sasoiko udal ostatalekuen tarifak

014.2025 – HENDAIA TURISMO & MERKATARITZA IMEP – Palmondoko sasoiko merkatua

Txostengilea: Nicole BUTORI and.

015.2025 – 2025eko dirulaguntzaren gaineko aitzinamendua – Eskola diru kopurua – SAINT-VINCENT ikastetxearen alde

Txostengilea: Michelle MOUNIOS-ADURRIAGA and.

016.2025 –  2025eko Musikolore Festibala – Tarifak

017.2025 –  2025eko dirulaguntzaren gaineko aitzinamendua LAGARBIIK EGINA elkartearentzat

Txostengilea: Itziar AIZPURU and.

018.2025 – Ikaste aldi zainduen zerbitzuetarako irakasleak kontratatzea eta orenkako ordain maila ezartzea

019.2025 –  Familia ekitaldien kausaz Lanean Ez izateko Baimen Berezien (LEBB-ASA) zerrendaren aldaketa

Txostengilea: Laurent PELEGRIN-ARAMENDY j.

020.2025 –  Elkarteentzako dirulaguntza – Inauteria eta Euskal Besta

Txostengilea: Chantal KEHRIG-COTTENÇON and.

021.2025 –  Hiri altzarien eskaintzeko, kokatzeko, zaintzeko, garbitzeko eta merkataritza ustiapena egiteko emakida duen Philippe VÉDIAUD publicité enpresaren urteko txostena

022.2025 – Hondartza jardunak – eskuordekoaren urteko txostena – 2. eta 4. multzoak

023.2025 –  Hendaiako Herriaren THPren 3. aldaketa laburtua – Herriko Kontseiluaren iritzia Euskal Hirigune Elkargoak onartu aitzin

Sinatzailea: Auzapez jauna,
Euskal Hirigune Elkargoaren Lehendakariordea,
Kotte ECENARRO
2025eko otsailaren 19an

Bi mila eta hogeita bosgarren urtean, otsailaren hogeita sei, asteazkenean, 18:30ean, Herriko Kontseilua bildu da Kotte ECENARRO auzapez jauna buru duela.

BERTARATUAK: ECENARRO j. (Auzapeza) – KEHRIG-COTTENÇON and., TRANCHE j., BUTORI and., MOUNIOS-ADURRIAGA and., ARRUABARRENA j., CAMACHO-SATHICQ and., GRABIÈRES j. (Auzapezordeak), BERNARD j., AIZPURU and., PELEGRIN-ARAMENDY j., TARIOL j., BEAUFORT and., JEHAN j., EIZAGUIRRE j., ROMAN and., MANTEROLA j., LEGARDINIER and. (017.2025 deliberamendua arte), ARZELUS-ARAMENDI j., NAVARRON and., COTINAT and., SALLABERRY j., DESTRUHAUT j., BARRERO and., ESTOMBA and., BALANZATEGUI j. (012.2025 deliberamendua arte), eta HIRIBARREN and.

AHALORDEAK: IRAZUSTA jaunak MOUNIOS ADURRIAGA andereari, LABEAU andereak TRANCHE jaunari, CEZA andereak AIZPURU andereari, HARAMBOURE andereak BUTORI andereari, LEGARDINIER andereak COTINAT andereari (018.2025 deliberamendutik landa), eta MARTIARENA-GARAT jaunak ARZALUS-ARAMENDI jaunari.

EZ DIRA HOR IZAN : POUYFAUCON jauna eta BALANZATEGUI jauna 013.2025 deliberamendutik landa.

BILKURA IDAZKARIA: COTINAT anderea.

Deialdiaren data: 2025eko otsailaren 19an.

Bilkuraren quoruma bete da.

Gai zerrendari ekin diote gero.

I – 2025eko URTARRILAREN 22ko HERRIKO KONTSEILUAREN BILKURA AGIRIA ONARTZEA:

Auzapez jaunak, Celine COTINAT andereari, bilkura idazkari izendatua izan delarik, 2025eko urtarrilaren 22ko herriko kontseilkuaren bilkuraren agiria irakur dezan eskatu dio.

AHO BATEZ OGARBISIA–

II – DELIBERAMENDUAK

011.2025 zk. DELIBERAMENDUA
GAIA: HERRIKO KONTSEILUAK EMANDAKO AHALMEN ORDEZKARITZAZ AUZAPEZAK HARTU ERABAKIAK
TXOSTENGILEA:  Kotte ECENARRO j.

Lurraldeen Kolektibitateen Kode Nagusiaren L 2122-23 artikuluak dioenari jarraikiz, auzapez jaunak eman du herriko kontseiluak 2020ko uztailaren 3ko deliberamenduz eman ordezkaritzaz hartu dituen honako erabaki hauen berri:

  • 003.2025, 2025eko urtarrilaren 20koa – Merkatu publiko baten deialdia – Prozedura egokitu irekia – Negu eta sasoiko ostatalekuen antolaketa – 3. multzoa: igeltsu lanak – 2. gehigarria – Hastapeneko merkatuaren kopurua: 46 632.86 € ZG; 2. gehigarriaren kopurua: 647.00 € ZG. Merkatuaren kopuru osoa gehigarriarekin: 47 279.86 € ZG –
    SAS JEAN GOITY.
  • 004.2025, 2025eko otsailaren 03koa – Merkataritza alokairu bat sinatzea Lekueder karrikako 18an –
    REY LOGISTIQUE sozietatearekin – haren izenean Henri LEVRERO jaunarekin.
  • 005.2025, 2025eko otsailaren 03koa – Lekueder karrikako 7an dauden Herriaren lokalen erabiltzeko hitzarmen bat sinatzea – Larrialdietarako ostatatze baliabidea – 2025eko urtea – GEUZ-CCAS.
  • 006.2025, 2025eko otsailaren 04koa – Herriaren lokalak denbora tarte laburrean erabiltzeko hitzarmena – 2. bulegoa – Garraio bitartekarien eraikina – Intzurako industrialdea – Lekueder karrika 18 –
    RECYCL’ARTE elkartea.

LKKN-CGCT DELAKOAREN L2122-22  ARTIKULUAREN ORDEZKARITZAZ EGIN MERKATU DEIALDIAK
(Hornikuntzak eta Zerbitzuak < 215 000 € eta Lanak < 5382 000 € ZG)

  • Identifikazio zenbakia: 20240404
  • Multzoaren izena: Negu eta sasoiko ostatalekuen antolaketa (3. multzoa – 2. gehigarria)
  • Titularra: SAS JEAN GOITY
  • Zenbatekoa: 647,00 €
  • Jakinarazpen data: 2025/01/15

EZTABAIDA EGIN ETA,

HERRIKO KONTSEILUA JAKINAREN GAINEAN DA – EZ DA BOZKARIK –

012.2025 zk. DELIBERAMENDUA
GAIA: 2025EKO AURREKONTU ORIENTABIDEEN EZTABAIDA
TXOSTENGILEA: Kotte ECENARRO j.

Ikusirik Lurralde Kolektibitateen Kode Nagusiaren L.2312-1 artikulua, aurrekontua bozkatu aitzin aurrekontu orientabideen gaineko eztabaida egin dadin agintzen duena.

«3500 biztanle eta hortik goitiko herrietan, auzapezak herriko kontseiluari aurkeztuko dio, aurrekontua aztertu baino bi hilabete lehenago, hala asmoan dituen hainbaturteko engaiamenduen nola zorraren egitura eta kudeaketaren gaineko txostena. Txosten horren gainean eztabaida eginen da, herriko kontseiluan, barne araudiaren L. 2121-8 artikuluak ezarri baldintzetan. Eztabaida horren kontuan hartzeko deliberamendu bat egiten da».

EZTABAIDA EGIN ETA,

Herriko Kontseiluak:

  • Kontuan hartu du aurrekontu orientabideen eztabaida, eranskinean doan aurrekontu orientabideen txostenean oin hartuz.

HERRIKO KONTSEILUA JAKINAREN GAINEAN DA – EZ DA BOZKARIK –

013.2025 zk. DELIBERAMENDUA
GAIA: SASOIKO UDAL OSTATALEKUEN TARIFAK
TXOSTENGILEA: Frédéric TRANCHE j.

Ikusirik Lurralde Kolektibitateen Kode Nagusiaren L.2122-21 artikulua, Herriaren jabetzen gainean auzapezak duen administratzaile zereginari buruzkoa,

Ikusirik auzapezorde jaunak honako hau azalduz egin txostena:

Lurralde kolektibitateek uda garaian aritzeko behar dituen langileak kontratatzeko dituzten zailtasunen aitzinean, turismoaren enpresek sasoiko langileak erakartzeko duten zailtasunaren aitzinean, Hendaiako Herriak 2024an erabaki zuen sasoiko bizitegi/ostatalekua eskaintzea.

2024ko eskaintza, genituen ostatalekuen kopurua zela eta, hondartza zaintzaile aritzeko kontratatu sasoilarientzat bakarrik izan zen, Elizazilio eta Domingoenea karriketan dauden ostatalekuetan.

2025eko eskaintza zabalagoa da, Intzura industrialdeko Lekueder karrikan kokaturiko leku berriarekin, maiatzaren lehenetik urriaren 31 bitarterako.

Halatan, 2025ean 13 ostataleku proposatuko ditugu, lehentasuna Hendaiako hondartzen zaintzaileei eta zerbitzu publikoetan ari diren beste langileei emanez horietako 6en kasuan. Sasoilariak kontratatzeko zailtasuna dela eta, ostatalekuaren eskaintzak nabarmen ekarri du erakargarritasun handiagoa eta hondartzen zaintza baliabide egokia atxikitzeko behar beste jende kontratatu ahal izatea. Ostatazearen gutxieneko iraupena hilabetekoa izanen da.

Kontuan hartuz sasoilarien eskaintza gutxitzen ari dela itsasertzeko herrien sektore orotan, ostatalekua prezio eskuragarrietan atzemateko zailtasunen ondorioz,

Kontuan hartuz beharrezkoa dela herriak sasoilarien arazo eta profiletara egokituriko tarifak proposatu ahal izatea eta, halatan, jende baliabide hori erakarri eta atxikitzeko bermea izatea,

Kontuan hartuz hitzarmen bat beharko dutela sinatu Herriak eta ostatalekua hartuko duen sasoilariak erabiltze horren arautzeko eta ordaindu beharrekoa kobratzeko bidea emateko,

EZTABAIDA EGIN ETA,

Herriko Kontseiluak:

  • Onartu du ostatalekurako honako tarifa hau: 300 euro/hilean (jarioak eta internet barne) eta 300 euroko kaudimena,
  • Baimena eman dio auzapez jaunari ostatalekua sasoilariari uzteko hitzarmenak sina ditzan.

AHO BATEZ ONETSIA –

014.2025 zk. DELIBERAMENDUA
GAIA: HENDAIA TURISMO & MERKATARITZA IMEP – Palmondoko sasoiko merkatua
TXOSTENGILEA: Frédéric TRANCHE j.

2024ko abenduaren 3ko deialdi baten ondorioz, Hendaia Turismo & Merkataritza IMEParen Zuzendaritza Batzordea 2024ko abenduaren 17an bildu zen egituraren 2025eko ekintza plana onartzeko.

Planak udaberrian aisialdi eta zerbitzu eskaintza areagotzea aurreikusten du, Hendaia «4 urtaroetako turismoleku» gisa ager dadin.

Testuinguru horretan, eta palmondoko sasoiko merkatuko erakusketariekin mintzatu ondoren, ekitaldi hori, urtero, apiriletik irailera jarraian antolatzea erabaki da. Lehen, 5-8 aste arteko geldialdia egiten zen udaberriko eta udako oporraldien artean.

Aipa dezagun ere ekitaldi hori Hondarraitz auzoko merkatarientzat ere interesgarria dela, kontsumitzaileak erakar baititzake.

2025eko apirilaren lehenetik goiti, palmondoko sasoiko merkaturako honako tarifa hauek ezartzea proposatu da:

  • Apiriletik ekainera
    • 5 data – Udaberriko oporraldia → 80 € garbi
    • Data 1 – Udaberriko oporraldia → 20 € garbi
    • 5 data sasoi aitzin – Eskola oporraldietatik at → 60 € garbi
    • Data 1 sasoi aitzin – Eskola oporraldietatik at → 15 € garbi
    • 10 datako prezio finkoa sasoi aitzin – Oporraldietan eta oporraldietatik at → 130 € garbi
  • Uda
    • Multzo 1 (7 data) – Uda → 235 € garbi
    • Data 1 – Uda → 45 € garbi

EZTABAIDA EGIN ETA, 

Herriko Kontseiluak:

  • Onartu du tarifa multzo hori.

AHO BATEZ ONETSIA – KEHRIG-COTTENÇON ANDREAK ETA TRANCHE JAUNAK EZ DUTE BOZKETAN PARTE HARTU.

015.2025 zk. DELIBERAMENDUA
GAIA: 2025EKO DIRULAGUNTZAREN GAINEKO AITZINAMENDUA – ESKOLA DIRU KOPURUA – SAINT-VINCENT IKASTETXEAREN ALDE
TXOSTENGILEA: Nicole BUTORI and.

Ikusirik Hezkuntza Kodea, bereziki L.442-5 artikulua,

Ikusirik Lurralde Kolektibitateen Kode Nagusia, bereziki L.1612-5
eta L.2321-2 artikuluak,

Ikusirik Hezkuntza Ministerioaren 2012ko otsailaren 15eko 2012-025 zk. zirkularra,

Kontuan hartuz Hezkuntza Kodea, zeinak ezartzen baitu elkartze kontratu bidezko irakaskuntza pribatuko ikastetxeen diruztapena baitezpadako gastua zaiola eskola kokaturik den herriari. Herriek eskola pribatuei eman beharra dieten diruzko parte hartzeak eskola publikoei ematen dizkieten baliabideen parekoak behar dira izan. Diruztapen hori diru kopuru finko batez da ordaintzen, Hendaian, kontratupeko ama eskola edo lehen mailako eskola pribatu batera doan ikasle bakoitzeko,

Kontuan hartuz Herriak bere aurrekontua bozkatzen duenean, hau da, martxoan, esleitzen dituela eskola diru kopuruak,

Kontuan hartuz Saint-Vincent ikastetxeak, eskugaineko diru beharrean izan eta aitzinamendu bat eskatu digula.

Saint-Vincent ikastetxeari, 2025eko diru kopurutik, 48.014 €ko aitzinamendua esleitzea proposatu da. Aitzinetik eman diru hori herriko kontseiluak 2025. urterako ikastetxeari esleituko dion diru kopurutik kenduko zaio.

EZTABAIDA EGIN ETA,

Herriko Kontseiluak:

  • Eskola diru kopurutik 48.014 €ko aitzinamendua esleitu dio Saint-Vincent ikastetxeari.

AHO BATEZ ONETSIA –

016.2025 zk. DELIBERAMENDUA
GAIA: MUSIKOLORE FESTIBALA 2025 – TARIFAK
TXOSTENGILEA: Michelle MOUNIOS-ADURRIAGA and.

Ikusirik Lurralde Kolektibitateen Kode Nagusia,

Ikusirik Merkataritza Kodea,

Ikusirik Kontsumoaren Kodea,

Kontuan hartuz Musikolore festibalaren kontzertuetara sartzeko txartel sistema ezarri behar dela,

Kontuan hartuz egitarauan izanen diren musika taldeen kontzertuetan erabili ohi diren tarifak,

Kontuan hartuz herrian tarifa murriztuak erabiltzen ditugula ere,

MUSIKOLORE festibalaren 2. edizioan, honako tarifa hauek onar ditzan proposatu zaio herriko kontseiluari:

  • Uztailaren 2, asteazkeneko kontzertuak

    • Tarifa arrunta: 30 €
    • *Tarifa murriztua: 25 €
    • 12-18 urtekoentzako tarifa: 15 €
    • *3-11 urtekoentzako tarifa: 5 €

  • Uztailaren 3, osteguneko kontzertua

    • Tarifa arrunta: 25 €
    • *Tarifa murriztua: 20 €
    • 12-18 urtekoentzako tarifa: 10 €
    • *3-11 urtekoentzako tarifa: 5 €

  • 2 egunetarako baimena

    • Tarifa arrunta: 50 €
    • *Tarifa murriztua: 40 €
    • 12-18 urtekoentzako tarifa: 20 €
    • *3-11 urtekoentzako tarifa: 8 €

*Tarifa murriztua (frogagiria aurkezturik):

  • abonamendudunak: kultura sasoiaren txarteldunak,
  • ikuskizunetako artekako langileak,
  • ikasleak,
  • langabezian direnak,
  • gutxieneko dirusarreradunak,
  • 10 pertsona baino gehiagoko taldeak,
  • Ahalmen urritasunen bat dutenak (eta laguntzailea urririk).

**12-18 urtekoen tarifa (frogagiria aurkezturik).

***3-11 urtekoen tarifa (frogagiria aurkezturik).

Linean salduriko txartelaren prezioari 0,50 zentimo erantsiko zaizkio (komisioa).

EZTABAIDA EGIN ETA,

Herriko Kontseiluak:

  • Onartu ditu goian proposaturiko tarifak.

AHO BATEZ ONETSIA –

017.2025 zk. DELIBERAMENDUA
GAIA: 2025EKO DIRULAGUNTZAREN GAINEKO AITZINAMENDUA LAGARBIIK EGINA ELKARTEARENTZAT
TXOSTENGILEA: Michelle MOUNIOS-ADURRIAGA anderea

Lagarbiik Egina elkarteak dirulaguntza eskaria egin dio Hendaiako Herriari 2025eko urtealdirako

Herriak aurrekontua bozkatzen duenean eman ohi dizkie dirulaguntzak elkarteei eta GEUZari. Halarik ere, Lagarbiik Egina elkarteak eskugainekoaren behar larria duenez, 2025eko dirulaguntzaren gaineko aitzinamendua egin diezaiogun behar du.

Lagarbiik Egina elkarteari dirulaguntzaren gaineko 10 000 €ko aitzinamendua eman diezaiogun proposatu da. Aitzinaturiko kopuru hori Herriko Kontseiluak 2025erako elkarteari esleituko dion dirulaguntzatik kenduko zaio.

Dirulaguntza hau gero esleituko zaion 2025eko funtzionamendu dirulaguntzaren aitzinamendua da.

EZTABAIDA EGIN ETA,

Herriko Kontseiluak erabaki du:

  • Lagarbiik Egina elkarteari 10 000 €ko dirulaguntza esleitzea.

AHO BATEZ ONETSIA –

018.2025 zk. DELIBERAMENDUA
GAIA: IKASTE ALDI ZAINDUEN ZERBITZUETARAKO IRAKASLEAK KONTRATATZEA ETA ORENKAKO ORDAIN MAILA EZARTZEA
TXOSTENGILEA: Itziar AIZPURU and.

Ikusirik Funtzio Publikoaren Kode Nagusia ,

Ikusirik 1966ko urriaren 14ko 66-787 zk. dekretua, irakasleek beren zerbitzu arruntaz at eginiko zenbait lan gehigarriren ordaintze maila ezartzen duena,

Ikusirik 1985eko urtarrilaren 11ko agindua, zenbait irakaslek tokiko kolektibitateen eskakizunez eta haien kontura eginiko ordu gehigarrien ordaintze maila ezartzen duena,

Ikusirik Hezkuntza Ministerioaren 2017ko martxoaren 3ko aldizkari ofiziala, zenbait irakaslek tokiko kolektibitateen kontura egin ordu gehigarrien ordaintze mailari buruzkoa,

Kontuan hartuz tokiko kolektibitateek Hezkuntza Ministerioaren irakasleei eska diezaiekeela irakasketa zerbitzuak, ikaste aldi zainduko zerbitzuak edota zaintza zerbitzuak egin ditzaten, egitarau ofizialetik at eta ikasleek betebeharreko ordutegiaz haratago,

Kontuan hartuz jadanik badirela herriaren lehen mailako eskoletan ikaste aldi zainduak plantan emanik eta haietako batzuek irakasleak behar dituztela,

Kontuan hartuz langileak kolektibitateek ordain ditzaketela ordainsariak emanez eta ordainsari horien ordukako prezioak ezin direla izan 1966ko urriaren 14ko 66-787 zk. dekretuak eta haren aldatze edo osatzeko testuek ezarri prezioak baino goragoak,

EZTABAIDA EGIN ETA,

Herriko Kontseiluak:

  • Baimena eman dio auzapez jaunari Hezkuntza Ministerioko irakasleak ikaste aldi zainduen zaintzarako kontrata ditzan, astean gehienez 10 orenetako zereginetan ari daitezen eskola garaietan, eta zehaztu du ordainsaria arauak ezarri baremoaren arabera emanen zaiela,
  • Zehaztu du horretarako dirua herriaren aurrekontuan aurreikusiko dela.

AHO BATEZ ONETSIA – NAVARRON AnDREAK EZ DU BOZKETAN PARTE HARTU.

019.2025 zk. DELIBERAMENDUA
GAIA: FAMILIA EKITALDIEN KAUSAZ LANEAN EZ IZATEKO BAIMEN BEREZIEN (LEBB-ASA) ZERRENDAREN ALDAKETA
TXOSTENGILEA: Itziar AIZPURU and.

Ikusirik Funtzio Publikoaren Kode Nagusia, bereziki L.622-1 artikulua eta hurrengoak,

Ikusirik 2015eko azaroaren 24ko deliberamendua, familia ekitaldien kausaz lanean ez izateko baimen bereziak aldatzen dituena,

Ikusirik Lurraldeko Lan Batzordeak 2024ko abenduaren 1ean eman aldeko iritzia,

Kontuan hartuz osatu eta zehaztu behar dela familia ekitaldien kausaz lanean ez izateko baimen berezien zerrenda, hala araudiaren bilakaera nola gizartearen eta familia egituraren bilakaerak kontuan hartzeko,

Zenbait alor edota ekitaldiren kasuan baimen berezi horiek arauturik dira eta ez dute deliberamenduren beharrik. Beste batzuen kasuan, berriz, gehienak familia ekitaldiei loturikoak, herriko kontseiluaren deliberamendu baten beharra dago haien aurreikusi eta arautzeko.
Herriko Kontseiluari dagokio, beraz, baimen berezi horien arrazoien, iraupenaren eta emate moldeen gaineko erabakia hartzea.

EZTABAIDA EGIN ETA,

Herriko Kontseiluak:

  • Aurreikusten du lanean ez izateko baimen bereziak emateko aukera, betiere auzapez jaunak erabaki ditzakeen zerbitzuaren beharren mugapean, familia ekitaldietarako, medikuntza ekitaldietarako edota deliberamendu honi erantsiriko taulan azaldu eta aurreikusi amatasunari loturiko ekintzengatik,
  • Zehaztu du halako baimen berezi bat eskuratzeko, langilea lanpostuan izan ohi den garaian behar dela ekitaldia gertatu. Langilea lanean ez bada (urteko oporraldia, ordain pausa, oporrak zatikatzeagatiko egunak, lanaldiaren murrizketa, eritasuna…), geldialdi horiek ez dira eteten baimen berezi horietako batekin ordezteko eta ezinen da gero berreskuratu. Lanean ez izateko baimen berezi horiek arrazoi zaien gertakariaren unean edo inguruan behar dira eskatu eta ezin dira gerorako utzi,
  • Erabaki du deliberamendu honek agindurikoak lehengo aginduen ordez direla eta berehala hasten direla indarrean.

AHO BATEZ ONETSIA –

020.2025 zk. DELIBERAMENDUA
GAIA: ELKARTEENTZAKO DIRULAGUNTZA – INAUTERIA ETA EUSKAL BESTA
TXOSTENGILEA: Laurent PELEGRIN-ARAMENDY j.

Ikusirik Lurralde Kolektibitateen Kode Nagusia,

Ikusirik 2000ko apirilaren 12ko legea herritarrek administrazioekiko harremanetan dituzten eskubideen gainekoa,

Kontuan hartuz elkarteen parte hartzea ororen onerakoa dela, gure zerbitzuek antolatzen dituzten besta aldien «elkarbizitza» garatzen laguntzen baitu,

Kontuan hartuz kultura jardun horrek «herritarren parte hartzea» plantan ematen laguntzen duela eta parte hartze hori funtsezko balorea zaiola Hendaiako Herriari,

Kontuan hartuz herriak agerian eman nahi dituela hala elkarteak nola herriaren gizarte eta kultura animazioan egiten dutenaren garrantzia,

Kontuan hartuz parte hartze hori testuinguru jakinean behar dela egin,

Elkarteek, Herriaren animazio eta bestetan parte hartzeko, gurdiak prestatzen dituzte Inauteri eta Hiri Besta ibilketetan.

Parte hartze horren esparrua zehazteko, parte hartzen duten elkarteei herriarekin hitzarmen bat sina dezaten proposatuko zaie. Tresna horrek Herriaren eta elkartearen betebeharrak zehaztuko ditu, bai eta gurdien prestatzeko Zopiteko lokalak erabiltzeko baldintzak eta erabiliko diren diruzko moldeak.

Elkarteei esleituko zaien diruzko laguntzaren kopurua gurdia zein besta motatarako prestatzen denaren arabera erabakiko da:

  • Hiri Bestarako: 1000 €ko dirulaguntza,
  • Inauterirako: 150 €ko dirulaguntza.

EZTABAIDA EGIN ETA,

Herriko Kontseiluak:

  • Onatu ditu 2025eko martxoaren lehenetik goiti erabiliko diren kopuru horiek,
  • Baimena eman dio auzapez jaunari hitzarmen hori sina dezan,
  • Baimena eman dio auzapez jaunari horri loturiko dokumentu oro sina dezan.

AHO BATEZ ONETSIA –

021.2025 zk. DELIBERAMENDUA
GAIA: HIRI ALTZARIEN ESKAINTZEKO, KOKATZEKO, ZAINTZEKO, GARBITZEKO ETA MERKATARITZA USTIAPENA EGITEKO EMAKIDA DUEN PHILIPPE VÉDIAUD PUBLICITE ENPRESAREN URTEKO TXOSTENA
TXOSTENGILEA: Chantal KEHRIG-COTTENÇON and.

Ikusirik Lurralde Kolektibitateen Kode Nagusia, bereziki L. 1411-3 eta R.1411-7 artikuluak,

Ikusirik Herriko Kontseiluaren 2019ko uztailaren 17ko 90.2019 zk. deliberamendua, publizitatekoak diren nola ez diren hiri altzarien eskaintzeko, kokatzeko, zaintzeko, garbitzeko eta merkataritza ustiapena egiteko kontratua Philippe VEDIAUD Publicité deitu enpresari esleitu diona,

Ikusirik Philippe VÉDIAUD Publicité enpresak eman digun 2023ko jarduera txostena,

Ikusirik zerbitzu publikoen udalaz kanpoko batzordeak 2025eko urtarrilaren 16an eman aldeko iritzia,

Hendaiako Herriak, 2019ko uztailaren 17ko 90.2019 zk. deliberamenduaren bidez, Philippe VÉDIAUD Publicité deitu sozietateari esleitu zion hiri altzarien eskaintzeko, kokatzeko, zaintzeko, garbitzeko eta merkataritza ustiapena egiteko zerbitzua.

Gogora dezagun emakida hori, hastapenean, 9 urterako eman zaiola.

Kontratuak honako hauek kokatzea aurreikusten du:

  • Herri informaziorako 21 planimetro altzari 2 m² zabal bakoitza,
  • 27 bidaiari aterpe publizitatedun nola publizitate gabeak,
  • 2 informazio zutoin ukigarri,
  • Herriko etxearen telebista pantailaren mantenimendua,
  • Herriaren planoak bi euskarritan hornitzea,
  • 2 m² zabal diren 48 afixako 25 kanpaina inprimatu eta kokatzea.

Altzarien publizitate ustiapenaren ordainez, emakidadunak urtean 5000 euroko merkataritza ordaina ematen dio herriari (urtero %1eko berrikuspenarekin).

Lurralde Kolektibitateen Kode Nagusiaren L. 1411-3 eta R. 1411-7 artikuluei eta emakida kontratuaren baldintza agiriaren 16. artikuluari jarraikiz, PHILIPPE VÉDIAUD PUBLICITÉ enpresak 2023. urteko txostena egin du (Eranskinean).

  1. urteko txosten horrek hiri altzarien egoera tekniko eta diruzkoa azaltzen du.

2023ko abenduaren 31n, 20 planimetro kokatu ditu. Planimetro 1 lanetarako kendu da.

23 bidaiari aterpe kokatu ditu, bai eta informazio zutoin bat: altzarien egoeraren eta kokatzearen arteko aldea epe luzeko lanengatik kentzearen ondorioz gertatzen da (igerilekua edo Errepublika plaza).

Negozio kopuruari dagokionean, Philippe VÉDIAUD Publicité sozietateak 78 684 €ko negozio kopurua egin du, urtean 157 000 € aurreikusiak zirelarik. Negozio kopurua ez da aurrekontuan eman zena, baina 2022an baino % 35,36 handiagoa da.

EZTABAIDA EGIN ETA,

Herriko Kontseiluak:

  • Onartu du jendeen eskura egonen diren eta publizitatekoak diren nola ez diren hiri altzarien eskaintzeko, kokatzeko, zaintzeko, garbitzeko eta merkataritza ustiapena egiteko zerbitzu publikoaren emakidaduna den Philippe VEDIAUD Publicité enpresak aurkeztu 2023. urteko txostena.

AHO BATEZ ONETSIA –

022.2025 zk. DELIBERAMENDUA
GAIA: HONDARTZA JARDUNAK – ESKUORDEKOAREN URTEKO TXOSTENA – 2. ETA 4. MULTZOAK
TXOSTENGILEA: Chantal KEHRIG-COTTENÇON and.

Lurralde Kolektibitateen Kode Nagusiaren L.1413-1 artikuluari jarraikiz, tokiko zerbitzu publikoen aholku batzordea 2025eko urtarrilaren 16an bildu zen herriaren tokiko zerbitzu publikoen eskuordekoen txostenen aztertzeko.

Ikusirik Eskari Publikoaren Kodearen L 3131-5 artikuluak, emakidadunak urtero txosten bat egin behar duela agintzen duena, zeinean emakida kontratua gauzatzeari loturiko eragiketa guztiak azaltzen dituen kontuak ekarri behar baititu, bai eta obra edo zerbitzuen kalitatearen analisia ere,

Ikusirik Lurralde Kolektibitateen Kode Nagusiaren L.1411-3 eta L.1413-1 artikuluak,

Ikusirik 2024ko uztailean sinaturiko hondartzetako multzoen ustiapenerako zerbitzu publikoaren eskuordetza hitzarmenak,

Ikusirik 2024ko urtealdirako hondartza jardunen eskuordearen urteko txostena,

Ikusirik Tokiko Zerbitzu Publikoen Aholku Batzordearen 2025eko urtarrilaren 16ko aldeko iritzia,

Kontuan hartuz deliberamendu honi erantsiriko hondartza multzoen ustiatzailearen 2024 urteko eskuordearen txostena biltzar erabakitzaileari aurkeztu behar zaiola azter dezan,

Kontuan hartuz hondartza jarduneko zerbitzu publikorako eskuordeko guztiak 2024ko ekainaren 3eko bilkuran hautatu zirela, 6 urterako, 2024ko uztailaren lehenean hasiz:

  • multzoa: Philomène Verrier eta Matthieu Raymond SAS CLUB NEPTUNE – Hondartzako klub jardunak,
  • multzoa: Philomène Verrier eta Matthieu Raymond SAS CLUB NEPTUNE – Hondartzako altzarien jardunak.

EZTABAIDA EGIN ETA,

Herriko Kontseiluak:

  • Kontuan hartu ditu 2024ko urtealdiko 2 eta 4 multzoen hondartza jardunen zerbitzu publikoaren eskuordekoak egin urteko txostenak.

HERRIKO KONTSEILUA JAKINAREN GAINEAN DA – EZ DA BOZKARIK –

023.2025 zk. DELIBERAMENDUA
GAIA: HENDAIAKO HERRIAREN THPREN 3. ALDAKETA LABURTUA – HERRIKO KONTSEILUAREN IRITZIA EUSKAL HIRIGUNE ELKARGOAK ONARTU AITZIN
TXOSTENGILEA: Chantal KEHRIG-COTTENÇON and.

Ikusirik Lurralde Kolektibitateen Kode Nagusia,

Ikusirik Hirigintza Kodea, bereziki L153-45 artikulua eta hurrengoak;

Ikusirik Hendaiako Herriaren Tokiko Hirigintza Plana, 2020ko otsailaren 22an Elkargo Kontseiluaren deliberamendu batez berrikusi eta onartu zena, 2022ko maiatzaren 21ean Elkargo Kontseiluaren deliberamendu batez lehenengo aldaketa sinplifikatu bat jaso zuena eta bigarren aldaketa sinplifikatua Elkargo Kontseiluaren 2023ko maiatzaren 13ko deliberamendu batez;

Ikusirik EHEren lehendakariaren 2023ko azaroaren 14ko erabakia, Hendaiako THPren 3. aldaketa sinplifikatuaren prozedurari ekiteko;

Ikusirik Hendaiako Tokiko Hirigintza Planaren 3. aldaketa sinplifikatuaren dosierra, Ingurumen agintaritzari eta Loturiko Pertsona Publikoei jakitera eman zaiena eta jendeen eskura eman dena;

Ikusirik ingurumen agintzaritzak 2024ko abuztuaren 8an eman adostasun iritzia, zeinean adierazten baitzuen ez zela Hendaiako THPren 3. aldaketa proiekturako ingurumen ebaluaziorik egin beharrik;

Ikusirik Euskal Hirigune Elkargoaren Elkargo Kontseiluaren 80 zk. deliberamendua, 2024ko irailaren 28koa, proiektu horren ingurumen ebaluazioa ez egiteko erabakia berretsiz, Ingurumen Agintaritzaren Eskualde Misioaren adostasun iritziari jarraikiz;

Ikusirik loturiko pertsona publikoek Hendaiako THPren 3. aldaketa sinplifikatuaren proiektuari buruz eman iritziak;

Ikusirik Hendaiako Herriak, loturiko pertsona publikoa den bezainbatean, THPren 3. aldaketa sinplifikatuari buruz eman iritzia, 2024ko irailaren 25eko 142-2024 zk. deliberamenduaren bidez,

Ikusirik 2024ko urriaren 14tik urriaren 15era bitartean jendeen eskura eman dela;

Ikusirik eskura emate horretan egin diren oharrak;

Ikusirik Hendaiako herriaren THPren 3. aldaketa sinplifikatuaren dosierra, Loturiko Pertsona Publikoen eta jendeen eskura jartzean jendeek eman iritziak, txosten honi erantsirik datozen bezala;

Hendaia Herriaren Tokiko Hirigintza Plana (THP) 2020ko otsailaren 22an Elkargo Kontseiluaren deliberamendu batek berrikusi eta onartu zuen; 2022ko maiatzaren 21ean, Elkargo Kontseiluaren deliberamendu batek lehenengo aldaketa sinplifikatu bat egin zion eta bigarren aldaketa sinplifikatua Elkargo Kontseiluaren 2023ko maiatzaren 13ko deliberamendu batek.

I/ 3. aldaketa sinplifikatuaren prozedurari ekitea eta horren gaia

Euskal Hirigune Elkargoak, lehendakariaren 2023ko azaroaren 14ko erabaki batez, Hendaiako THPren 3. aldaketa sinplifikatuari ekin zion, honako xede hauekin:

  • Lur eremu zenbaiten arauen bilakaera, hornikuntza kolektiboetarako erabiliko direla baieztatzeko;
  • Zehaztapen bat egitea «Les Flots» deitu Antolaketa eta Programatze Orientabideen gainean, sektore horretan kokatuko diren hornikuntzen izaera argitzeko;
  • Itsas Ospitalearen lur eremuan azpisektore bat sortzea, hango langileentzako bizitegien egiteko, langileak atxiki eta lanleku hori erakargarri egiteko xedez;
  • Intzura aldean UYh sektore bat sortzea, udaldian sasoiko ostataleku proiektu bat gauzatzeko aukera emateko eta neguko larrialdiko ostatatze baliabideari erantzuteko;
  • UA, UB, UC eta UD zonetako 11. artikulua aldatzea teilatuetan eguzki panelak kokatzeari dagokionean (teilatuaren gainetik kokatzea baimentzea);
  • 2 akats material zuzentzea:
  • Administrazio Auzitegiko epaileak berrikuste orokorrean akats bat egin zela ikusi zuen 2023an, Kaneta auzoko THPren Uda sektorean,
  • Araudiaren aldaketak (gizarte mistotasuneko sektoreak) «Candite-Orio» Antolaketa eta Programatze Orientabidera ekartzen ahaztea

II/ Proiektuak ingurumenean dituen eraginak

Ingurumen Kodeak eta Hirigintza Kodeak agintzen dutenari jarraikiz, lngurumen Agintaritzarengana jo du Euskal Hirigune Elkargoak. Ingurumen Agintaritzak 2024ACNA88 zk. adostasun iritzia eman zuen 2024ko abuztuaren 8an, zeinean erran baitzuen ez zela aldaketa proiektuaren ingurumen ebaluaziorik egin beharrik. Elkargo Kontseiluak erabakia berretsi zuen 2024ko irailaren 28an.

III/ Loturiko pertsona publikoek proiektuari buruz eman iritziak

2024ko uztailaren 25az geroztik, Loturiko Pertsona Publikoei eman zaie dosierra jakitera, iritzia eman dezaten, hau da: Pirinio Atlantikoetako prefetari, Baionako suprefetari eta Pirinio Atlantikoetako Itsas Lurraldeen Departamendu zuzendariari, Akitania Berriko Eskualde Kontseiluaren lehendakariari, Pirinio Atlantikoetako Departamendu Kontseiluaren lehendakariari, Euskal Herriko eta Seignanx-eko LuKEaren Sindikatu Mistoaren lehendakariari, Euskal Herri-Aturriko Mugikortasunen Sindikatuaren lehendakariari, Euskal Hirigune Elkargoaren lehendakariari (Bizitegien Tokiko Planean duen eskumenarengatik), Baiona-Euskal Herriko Merkataritza eta Industria Ganberaren lehendakariari, Lanbideen eta Eskulangintzaren Ganberaren lehendakariari, Pirinio Atlantikoetako Laborantza Ganbararen lehendakariari, Hendaiako auzapezari, SNCF Réseaux sarearen zuzendariari, Oihan Jabegoen Nazio Zentroaren zuzendariari (CNPF), INAO erakundearen zuzendariari, Itsaski Hazkuntzaren Eskualde Atalaren lehendakariari.

Orotara, 10 loturiko pertsona publikok eman dute proiektuaren gaineko iritzia. Hemen beherean duzue horien laburpena, bai eta kolektibitateak dosierra onartzeko nola kontuan hartu dituen:

  • 2024/07/30 – INAO
    • Iritziaren laburpena: Oharrik ez
    • Proiektu eramailea den kolektibitatearen erantzuna: Ezer ez
  • 2024/08/02 – Ohian Jabegoaren Nazio Zentroa
    • Iritziaren laburpena: Aldekoa oharrik gabe
    • Proiektu eramailea den kolektibitatearen erantzuna: Ezer ez
  • 2024/08/07 – 64 Laborantza Ganbara
    • Iritziaren laburpena: Aldekoa oharrik gabe
    • Proiektu eramailea den kolektibitatearen erantzuna: Ezer ez
  • 2024/09/02 – Euskal Herri-Aturri Mugikortasunen Sindikatua
    • Iritziaren laburpena: Aparkatze araua apaltzea proposatu du:
      • UH zonan, bizitegi bakoitzeko leku 1era
      • UY zonan, bizitegi bakoitzeko 0.5 lekura
    • Proiektu eramailea den kolektibitatearen erantzuna: Eskari horiek ez dira aldaketaren gaiarekin zuzenki loturik. Herriko beste sektore eta auzotan ere gogoeta berdina egin liteke. THParen beste bilakaera prozedura izan liteke aparkatze arauak herri osoan nola bilaka litezkeen gogoetatzeko aukera. Ø Dosiera ez da, beraz, aldatu.
  • 2024/09/05 – Lanbideen eta Eskulangintzaren Ganbara
    • Iritziaren laburpena: Oharrik ez
    • Proiektu eramailea den kolektibitatearen erantzuna: Ezer ez
  • 2024/09/12 – LuKE
    • Iritziaren laburpena:
      1. Aldekoa, betiere bizitegien gizarte ekintzako izaera bermatzen bada
      2. Ostatatze proiektuak ekonomia zonan mistotasuna areagotzeko gogoeta ekartzeko balio dezala proposatu du
    • Proiektu eramailea den kolektibitatearen erantzuna:
      1. Proiektuak zonan diren osasun eta gizarte jardunetara loturiko %60 bizitegi aurreikusten ditu eta % 40 bizitegi aske, betiere prezio eskuragarrietan. Herriak zainduko du helburu horiek gauzatzeko aukera emanen duten baldintzak sartuko direla Parisko Ospitaleak eginen duen proiektu deialdian.
      2. Ezer ez. Ø Dosierra ez da, hartara, aldatu.
  • 2010/09/20 – EHE – Bizitegiak
    • Iritziaren laburpena: 3. aldaketa sinplifikatua Tokiko Bizitegi Planarekin bateragarri izatea
    • Proiektu eramailea den kolektibitatearen erantzuna: Eskari hori ez da aldaketaren gaiaekin zuzenean loturik eta hori onartzeak prozeduraren sendotasun juridikoa ahulduko luke. Izan ere, gizarte mistotasunaren araua sektore horretan aldatzeak prozedura honek ukitzen ez dituen THParen gainerako zonetan ere aldatzea ekarriko luke. THParen beste bilakatze prozedura bat izan liteke gizarte mistotasunaren araua zehazteko eta bizitegi lagunduen motak herri osorako helburu orokorren barnean sartzeko aukera. Herriak zainduko du helburu horien gauzatzeko aukera emanen duten baldintzak eta Hirien Berritzeko eta Elkartasunerako Legearen aginduetara egokitzeko betebeharrak Parisko Ospitaleak eginen duen proiektu deialdian sartuko direla.
  • 2024/09/25 – Hendaia
    • Iritziaren laburpena: UHp2 zonan sailkatu beharreko lursailari buruzko akats materiala
    • Proiektu eramailea den kolektibitatearen erantzuna: Agiri grafikoan gertatu akats materiala zuzendu da dosierrean, onartua izan dadin (158 lursaila (157/159 izan ordez) UHp2 sektore berrian sailkatua da).
  • 2024/10/09 – Estatua
    • Iritziaren laburpena:
      1. Akats grafikoa UHp2 azpisektoreetako lursailen zedarritzean
      2. Bizitegi lagunduen moten sailkapena sartzea (gutxienik % 30 Gizarteratzeko Alokairu Mailegu Lagundu edo Gizarte Laguntzako Alokairu Mailegu asmo den bizitegi lagunduen % 60eko kopuruan)
      3. dio UHp2 azpisektorea 100 metroen zerrendan sartzen dela eta, horrela izanik, sektore horretan eginen den hedatze eta berreraikitze oro zerrenda (eraikiezina) horretatik at egin beharko da
    • Proiektu eramailea den kolektibitatearen erantzuna:
      1. Akats materiala zuzendu da (ikus goian)
      2. Eskari hori ez da aldaketaren gaiei zuzenean loturik eta hori onartzeak ahulduko luke prozeduraren sentotasun juridikoa. Izan ere, gizarte mistotasunaren araua sektore horretan aldatzeak prozedura honek ukitzen ez dituen THParen gainerako zonetan ere aldatzea ekarriko luke. THParen beste bilakatze prozedura bat izan liteke gizarte mistotasunaren araua zehazteko eta bizitegi lagunduen motak herri osoko helburu orokorren barnean sartzeko aukera. Herriak zainduko du helburu horien gauzatzeko aukera emanen duten baldintzak eta Hirien Berritzeko eta Elkartasunerako Legearen aginduetara egokitzeko betebeharrak Parisko Ospitaleak eginen duen proiektu deialdian sartuko direla.
      3. Hala da, bai, zerrenda horretan ezinen da inolako eraikitze berri edo hedatzerik egin eta proiektuak hori hartu beharko du kontuan. Gisa berean, urertzetik hurbil diren lekuetako arauak bete beharko ditu ere (UH zonaren «p» indizea): «eraikin berriak egin litezke, betiere hiritartzearen hedatze mugatuaren definizioa betez gero. Proiektuak bete beharko ditu (…) lehendik diren inguruko ezaugarri orokorrak lurraren eraginari dagokionean, landareztaturiko lekuen ehunekoari dagokionean, eraikinen goratasunari dagokionean, eraikinak bideetan edota mugetan kokatzeari edo gibelera emateari dagokionean.
  • 2024/10/23 – SNCF
    • Iritziaren laburpena: Aldekoa oharrik gabe
    • Proiektu eramailea den kolektibitatearen erantzuna: Ezer ez

IV/ Jendeen eskura jartzearen nondik norakoa eta bilana

Jendeen eskura eman zen, 2024ko urriaren 14tik azaroaren 15 bitartean, biak barne, Hendaiako THParen 3. aldaketa sinplifikatuaren proiektuaren dosierra, Hendaiako Herriko Etxean eta Euskal Hirigune Elkargoaren egoitzan eta webgunean.

Horren osagarri, paperezko bi erregistro eman dira (herriko etxean eta Euskal Elkargoaren egoitzan), bai eta erregistro digital bat.

Bilanean, erregistro digitalean 441 bisita zenbatu dira, bai eta hemen beherean laburturiko ohar bakar bat:

  • Oharren euskarria – Data : Erregistro digitala – 2024/11/12
  • Oharraren laburpena : Etorkizuneko UHp2 sektorean proiektu eramaile batek eman egingarritasun azterketa.
  • Proiektu eramailea den kolektibitatearen erantzuna eta dosierraren aldaketa onartua izan dadin :
    • Egingarritasun azterketa horren emateak ez ditu zalantzan jartzen egin asmo diren THParen aldaketak, dosierraren jendeei eskura emate prozeduran aurkeztu zaien gisan.
    • Erakusten du, aldiz, UHp2 zonan sailkatu beharreko lursailari dagokion akats materiala: onartze dosierra aldatu da zona aldaketa jasaten duen lursail egokia sartuz (158 lursaila eskura emate prozeduran aurkeztu diren 157/159 lursailen ordez).

V/ Proiektuari ekartzeko proposatu diren zuzenketak

Loturiko Pertsona Publikoen galdeketa eta proiektua jendeen eskura jartzea bururatzean, 3. aldaketa sinplifikatuaren dosierra aldatu da Loturiko Pertsona Publikoen iritzien eta jendeen ekarpenen laburpena dakarren eta kolektibitateak horiek nola kontuan hartu dituen azaltzen dituzten goian aurkeztu tauletan azaldu bezala.

VI/ Dosierra onartzeko prest da

Hendaia Herriaren THParen 3. aldaketa sinplifikatuaren dosierrak, onartua izateko aldaturik, honako hauek azaltzen dituen azalpen oharra dakar:

  • Prozeduraren zergatiak eta hautua,
  • Indarrean den THPari ekarri aldaketak,
  • Proiektuak ingurumenean dituen eraginak.

Dosierra onartua izateko prest da.

EZTABAIDA EGIN ETA,

Herriko Kontseiluak:

  • Kontuan hartu du Hendaia Herriaren Tokiko Hirigintza Planaren 3. aldaketa sinplifikatuaren dosierra jendeen aitzinean hilabetez aurkeztu izanaren bilana;
  • Aldeko iritzia eman du Hendaia Herriaren Tokiko Hirigintza Planaren 3. aldaketa sinpifikatuaren proiektuaren gainean, honako deliberamenduari erantsirik den bezala, Euskal hirigune Elkargoaren Elkargo Kontseiluak onar dezan.

AHO BATEZ ONETSIA –

Gai zerrenda bururatua delarik, auzapez jaunak biltzarrari eskerrak eman eta bilkura amaitutzat eman du 20:55ean.