KE.IG – 008.2025
Bi mila eta hogeita bosgarren urtean, urtarrilaren hogeita bi, asteazkenean, 18:30ean, Herriko Kontseilua bildu da Kotte ECENARRO auzapezaren lehendakaritzapean.
BERTARATUAK: ECENARRO j. (auzapeza), – KEHRIG COTTENÇON and., TRANCHE j., BUTORI and., MOUNIOS-ADURRIAGA and., ARRUABARRENA j., CAMACHO-SATHICQ and., GRABIÈRES j. (Auzapezordeak), BERNARD j., AIZPURU and., PELEGRIN-ARAMENDY j., TARIOL j., BEAUFORT and., CEZA and., JEHAN j., HARAMBOURE and., EIZAGUIRRE j., ROMAN and., MANTEROLA j., LEGARDINIER and., ARZELUS-ARAMENDI j., NAVARRON and., MARTIARENA-GARAT j., SALLABERRY j., DESTRUHAUT j., BARRERO and., ESTOMBA and., BALANZATEGUI j., HIRIBARREN and.
AHALORDEAK: IRAZUSTA jaunak MOUNIOS-ADURRIAGA andreari, LABEAU andreak TRANCHE jaunari, POUYFAUCON jaunak DESTRUHAUT jaunari, eta BALANZATEGUI jaunak ESTOMBA andreari
BILKURA IDAZKARIA: Céline COTINAT and.,
Deialdiaren eguna: 2025eko urtarrilaren 15.
Biltzarraren quoruma bete denez, auzapez jaunak hasiera eman dio bilkurari.
Gai zerrendari ekin diote.
I – 2024KO ABENDUAREN 18KO HERRI KONTSEILUAREN BILKURAREN AKTA ONARTZEA
Auzapez jaunak, 2024ko abenduaren 18ko bilkuraren bilduma COTINAT andreari, bilkura idazkari den bezainbatean, irakur dezan galdegin dio.
Dokumentu hori bozketara eman da.
AHO BATEZ ONETSIA –
II – DELIBERAMENDUAK
001.2025 zk. DELIBERAMENDUA
GAIA: HERRI KONTSEILUAK EMAN AHALMEN ORDEZKARITZAZ AUZAPEZAK HARTU ERABAKIAK
TXOSTENGILEA: Kotte ECENARRO j.
AUZAPEZ JAUNAK: Lehen deliberamendua auzapezak hartu erabakiei buruzkoa da. Jakinaren gainean zaretela erran dezazuen eskatzen dizuet.
HERRIKO KONTSEILUA JAKINAREN GAINEAN DA. EZ DA BOZKARIK.
AUZAPEZ JAUNAK: Bigarren deliberamendura goaz orain, Mayotteko herritarrekiko elkartasunari buruzkora.
002.2025 zk. DELIBERAMENDUA
GAIA: ELKARTASUNA MAYOTTE-KO HERRITARREKIN
TXOSTENGILEA: Kotte ECENARRO j.
AUZAPEZ JAUNAK: Ikusirik Lurralde Kolektibitateen Kode Nagusia, bereziki haren L1111-1 artikulua,
Ikusirik Mayotte uhartean, CHIDO zikloia 2024ko abenduaren 14an pasatzeak ekarri duen osasun egoeraren larria,
Frantziako Auzapezen Elkarteak, Babes Zibilarekin, Gurutze Gorriarekin, France urbaine, ANEL eta UNCCAS deiturikoekin partzuergoan, Mayotteko herritarrak, herriak eta hautetsiak sostengatzeko nazio elkartasunean parte hartzera deitu ditu bai herriak eta baita herriarteko erakundeak. Gobernua eta segurtasun zibileko labeldun elkarte guztiak lanean ari dira gertakari dramatiko horrek jorik diren herritarren laguntzeko.
Hendaiako Herriak, ezohiko izaria duen hondamendi horrek ekarri dituen giza dramek eta kalte materialek hunkiturik, sostengua eta elkartasuna ekarri nahi die Mayotteko herritarrei.
Halatan, honako hau proposatu zaio Herriko Kontseiluari:
Mayotte-ko CHIDO zikloiaren biktimak sostengatzen ahal duen mailan parte hartzea,
Frantziako Auzapezen Elkartearen partzuer den Babes Zibilari 1000 € ematea,
Auzapez jaunari deliberamendu honen gauzatzeko dokumentu oro sinatzeko baimena ematea.
AUZAPEZ JAUNAK: Onartzen duzue deliberamendu hau? Bai? Ez? Abstentziorik?
AHO BATEZ ONETSIA –
AUZAPEZ JAUNAK: Eskertzen dizuet; Fréderic TRANCHE jaunak du hitza.
003.2025 zk. DELIBERAMENDUA
GAIA: HENDAIA TURISMO & MERKATARITZA IMEPa – 2025eko hastapeneko aurrekontua
TXOSTENGILEA: Frédéric TRANCHE j.
TRANCHE JAUNAK: Turismo eta Merkataritza Bulegoaren hastapeneko aurrekontua dugu hemen.
2024ko abenduaren 3an egin deialdiari jarraikiz, 2024ko abenduaren 17an bildu zen Hendaia Turismo & Merkataritza IMEParen zuzendaritza batzordea eta aho batez onartu zuen 2025erako hastapeneko aurrekontua;
Aurrekontu horretan ageri da IMEPak heldu diren lau urteetarako duen turismo eta merkataritzaren aldeko garapen estrategia eta kontuan hartzen du egonaldi zergaren apaltzeari loturiko diru sarreren gutxitzea (oporlekuan turismorako bizitegiak gutxitzea).
- 2025erako funtzionamendu atalaren aurrekontuaren oreka kopurua: 1.958.861 €,
- 2025erako inbestimendu atalaren aurrekontuaren oreka kopurua: 152.547 €.
Halatan, honako hau proposatu zaio Herriko Kontseiluari:
- onar dezala Hendaia Turismo & Merkataritza IMEParen 2025erako hastapeneko aurrekontua.
AUZAPEZ JAUNAK: Bai, CAMACHO andrea?
CAMACHO SATHICQ andreak: Soilik erran ezen oroitzapenen Hiriak «Turismoa & Ahalmen urritasuna» labela eskuratu duela honako molde hauetan: Entzumen urritasuna, buruko ahalmen urritasuna, ahalmen urritasun motorea eta ikusmen urritasuna. Milesker.
AUZAPEZ JAUNAK: Milesker CAMACHO andrea.
Bai, LEGARDINIER andrea?
LEGARDINIER andreak: Arratsalde on deneri. Hasteko, Hendaiako herriaren ekonomia egoerari buruzko zenbait datu nahi dizuet eman. Jarduera sektoreka honela banatzen dira lanpostuen kopuruak:
- Laborantza eta arrantzan: 156, hau da, % 2,6,
- Industrian: 1066, hau da, % 18,
- Eraikuntzan: 296, hau da, % 5,
- Merkataritza, garraio, hainbat zerbitzutan: 2159, hau da, % 36,5,
- Administrazio publiko, irakaskuntza, osasun, gizarte ekintzan: 2231, hau da, % 37,8.
Eta negozio kopuruari begiratuz gero, izan ere, esanguratsuena litzakeena agian:
- Turismoaz besteko zerbitzuetan: 464 000 554 700 €, hau da, % 49,
- Industrian: 425 168 700, hau da, % 45,
- Eta turismo enpresetan: 53 277 336, hau da, % 6, zeinetan erdia hotelek, akanpalekuek eta alokatze laburrek baitute egiten.
Gainerako % 3 turismo enpresak ez diren eta urte osoan zehar aritzen diren jatetxe tradizionalei janari lasterreko enpresei eta edari salmentei dagokie.
Turismo jardueraz ari garenez, zenbait aipamen nahi ditut berriz ekarri. Merkatu ondasunek 38 520 ohe dituzte, honela banaturik: hoteletako merkataritza ostatatzeak (676 ohe), % 30eko batezbesteko erabiltze mailarekin, akanpalekuak (3092 ohe), hau da, eskaintzaren % 10, eta sasoiko alokantzak eskaintzaren % 13, % 40ko erabiltze mailarekin.
Konpentsazio neurriak alokantza horien herena ukituko duela kalkulatzen da.
Geratzen den ohe kopuruen aukera gora da oraindik ere. Merkataritzaz kanpoko ondasunak bi motatakoak dira:
- 8358 ohe, hau da, % 21: senideenean edo adiskidenean ostatatzen direnak,
- eta bigarren bizitegiak: 21 057 ohe, hau da, % 52, % 40ko erabiltze mailarekin; horrela, bigarren bizitegiak dira turismo ostatatze molde nagusia.
Hendaian pertsona bakoitzak egunean gastatzen duenaren datuak ere ditugu. Adibide baterako, 111,80 €ko batezbesteko kopuru batetik:
- 53 , hau da, % 48, bizitegirako dira; izugarrizko kopurua da hori,
- 18,96 , hau da, % 21, jateko dira,
- eta ondasun iraunkorren erosketetan 8 €, hau da, % 7.
Halatan, bada, hurbileko merkataritzan horrek duen eragina ez da horrenbestekoa.
Aztertzen ari garen aurrekontuari dagokionean, ikusten dugu, 2025erako aurreikuspenetan, funtzionamendu aurrekontua 265 437 € apalagoa dela. Horietan, langile kargak 64 321 € apalagoak eta izaera orokorreko kargak eta aurreikusi gabeko gastuak 118 185 € apalagoak. Hautu horiek zerbitzuaren kalitatea ez ote dute kaltetuko eta lan baldintzak andeatuko.
Gure hotel eskaintza garatu behar dugu eta bidean da hori: gazte aterpea lehengo Santiago hotelaren lekuan, Hôtel des Flots deiturikoa, sasoiko alokantzak Valencia hotelean. Horrek egonaldi zergan eraginen du eta, agian, hotel eskaintza berria sortuko da. Baina horretarako, THPa aldatu behar dugu edo zonaketa gisako bat sartu hTHPean.
IMEParen bilakaerari aitzina hartu eta HENDAIA MERKATARITZA azkartu behar dugu eta sasoian alokatzen duten jabeak lagundu, bai eta euskal turismo bulegora sartzeko baldintzak aztertu, gainerako herriak egiten ari diren bezala.
Eta konpentsazio neurriari egin iruzurraren aurka egiteko bitartekoak behar ditugu eskuratu ere. Milesker.
AUZAPEZ JAUNAK: Ez dakit zer ulertu behar den, baina turismo bulegoaren agiantza ekitaldian erran denaz zenbait informazio eman dezaket.
Turismoa Hendaiako jardunaren % 18 da. Ez dugu negozio kopurua emaitzarekin, lanpostuekin eta ekonomia garapenarekin erkatuko.
Gogora dezagun Hendaian turismoari loturik diren lanpostuak 800 direla, horietan 400 urte osokoak.
Gogora dezagun, gaia turismo bulegoaren buruak ekarri duenez, Herri Kontseiluaren gehiengoak bozkatu ez dituen konpentsazio neurrietaz nuen iritzia, zeren, in fine, ongi badakigu bizitegiaz ari garela, urte osorako bizitegien xerka garela guztiok. Gai bakarra, geratuko den zinezko gai bakarra, dugu ea, batzuek eta besteek, bigarren eragin txarrak alde batera utziz edo gainean hartuz hartuko ditugun neurri guztiak hartu ondoren, bizitegi horietako zenbat etorriko diren urte osorako alokantzara? Neurri horietan guztietan interesatzen zaigun kopuru bakarra dugu hori.
Neurri horiekin, oraingoz, eragin txarrak besterik ez dugu ikusten, eta gure turismo ekonomiak bete-betean jasanen ditu, lehen bizpahiru urteotan bederen, neurri horiek, urterako bizitegiak ez baitira, seguruenik, kopuru handitan eskuratuko Hendaian.
Berriz ere diot, ez naiz beste herrietaz ari; ezagutzen dudan herriaz ari naiz. Hendaiaz ari naiz eta erran diezaizueket ezen, gaurko egoeran, egiten ari garen ahalegin guztiengatik ere, bereziki Laurent TARIOL gure kideak beren bizitegia urte osorako alokantzan eman lezaketela atzeman 500 herritarrei idatzi dielarik bizitegia alokantzan eman dezaten, eta halere, konturatu gara aldea dagoela Finantzen Zuzendaritza Nagusiak igorri digun zerga errealitatearen eta tokiko errealitatearen artean, non asmo oneko jendeek hutsik dituzten bizitegien gaineko zergak ordaintzen dituzte, baina nahiago baitute bizitegi hutsen gaineko zerga hori ordaindu ezen ez urte osorako alokantzan eman; hor errealitateak harrapatzen gaitu eta hiruzpalau edo bost bizitegi huts eskuratzen dugunean, berriz, huts dira, bai, baina erabil ezinak ere dira, andeaturik baitira eta diru kopuru handiak behar dira andeaturiko bizitegi horien zaharberritzeko. Diru horiek Biharko Hiri Txikiak programaren harira ari gara plantan ematen; arduratzen gara, baina jakin ezazue ezen, bizitegi zenbaiten zaharberritzeko % 80ko dirulaguntza eskuratuko bagenu ere, eta ez dugu hori eskuratuko, halere hendaiarrek erranen ligukete ez dutela zaharberritze horretarako gainerako % 20ko diru hori.
Halatan, zailtasun baten aitzinean gara. Hendaiaren zailtasuna da; baliteke beste herrietan ez hala izatea, baina kide horiek, tokiko zailtasun hori kontuan har dezazuen eskatzen dizuet.
Bada turismo bulegoari buruzko beste aipurik? Ez dut inor ikusten; hartara, bozka dezagun. Nork onartzen du deliberamendua? Aurkako bozik edo abstentziorik?
AHO BATEZ ONETSIA –
AUZAPEZ JAUNAK: Eskertzen dizuet. Hurrengo gaiaren arduraduna: TRANCHE jauna
004.2025 zk. DELIBERAMENDUA
GAIA: BIDE SEGURTASUNAZ OHARTARAZTEKO JARDUNAK SOSTENGATZEKO PROIEKTU DEIALDIA (PDASR) – 2025EKO URTEA
TXOSTENGILEA: Frédéric TRANCHE j.
TRANCHE JAUNAK: Bete-betean interesatzen zaigun gaia dugu bide segurtasunaren eta ohartarazte jardunen gaia. Deliberamendu hau aho batez bozkatuko dugula espero dut, Estatuari eta Departamenduari Bide Segurtasunerako Jardueren Departamendu Planaren harira (PDASR) diruzko laguntza eskatzea baita.
Herriaren honako helburu hauek ditu:
- bide segurtasunaz eta araudiaz ohartaraztea,
- Ziklomotor eta txirrinduak gidatzen ikasi eta hobetzea,
- Elkarren begiramena eta herritartasuna garatzea,
- Zirkulazioan bi gurpilekoa edo txirrindua gidatzeak dituen arrisku bereziak ezagutzea.
Gure gazteak ohartarazi ahal izateko, udal zerbitzuek bi tresna dituzte: “bi gurpilekoen segurtasuna” proiektua kolegioko ikasleentzat, eta “Txirrinduz ibiltzen jakitea” proiektua lehen mailako laugarren eta bosgarren urteetako ikasleentzat.
Proiektu horiek gure gazteak aktiboki lotzen dituzte biktima gerta litezkeen bide istripuen prebentzioan, motordun bi gurpilekoetan eta txirrinduetan.
Hor goiko elementu horiek oinarri harturik, honako hau proposatu zaio Herri Kontseiluari:
Dirulaguntza ahal bezain handiak eskatzea PDASR proiektu deialdiaren harira 2025eko urterako,
- Dirulaguntza eskariak egitea Estatuaren zerbitzuei, PDASR delakoaren proiektu deialdiaren harira, 2025. urterako,
- Baimena ematea auzapez jaunari horri loturiko dokumentu oro sina dezan.
TRANCHE JAUNAK: Deliberamendu horren luzapentxo bat MARIÉ Mariée andreak eta GALLET jaunak gidatu duten lehen sokorri keinuetarako formakuntza handi-handia eprestatzeko lotu diren guztiak, teknikariak, administrazio langileak eta udal zerbitzuetako langile guztiak eskertzeko. Halatan, bada, biziki eskertzen dizuet, zeren, istripua bada, Hendaia are eta hobetoxe babestua izanen baita.
AUZAPEZ JAUNAK: Milesker TRANCHE jauna. Bada zer erranik deliberamendu honen gainean? Ez dut halakorik ikusten; bozka dezagun. Nork onartzen du? Bada aurkako bozik, abstentziorik?
AHO BATEZ ONETSIA –
AUZAPEZ JAUNAK: Eskertzen dizuet; Itziar AIZPURU andreak du hitza.
005.2025 zk. DELIBERAMENDUA
GAIA: ORDAINPEKO APARKATZEA URTE OSOAN HONDARRAITZ SEKTOREAN – JARDUNAREN AREAGOTZEA – KARRIKA ZAINTZAILE LANPOSTUAK SORTZEA
TXOSTENGILEA: Itziar AIZPURU and.
AIZPURU andreak: Auzapez jaunak jakitera eman die kontseilukideei aldi baterako zenbait lanpostu sortu behar dela ordainpeko Aparkatze Zerbitzuan, zona gorria (Hondarraitz auzoan) urte osoan ordainpeko izatera pasatzea baldintza ahal bezain onetan antolatzeko.
Kontuan hartuz Funtzio Publikoaren Kode nagusiaren L. 332-23 1 artikuluak baimentzen digula iraunkor ez diren lanpostuetarako kontratu bidez hartzea langileak jarduna aldi baterako areagotuz gero, betiere gehienez hamabi hilabetez hemezortzi hileko aldi batean, luzapena ere barne.
Honako hauek sor ditzazuen proposatzen dizuet:
- 2 lanpostu: Karrika Zaintzaile, lanaldi osoz, 2025eko otsailaren lehenetik 2026ko urtarrilaren 31 bitarterako,
- Lanpostu 1: Karrika Zaintzaile, lanaldi osoz, 2025eko apirilaren lehenetik 2025eko urriaren 31 bitarterako,
- 7 lanpostu: Karrika Zaintzaile, lanaldi osoz, 2025eko uztailaren lehenetik 2025eko abuztuaren 31 bitarterako,
Lansariaren oinarrria: Funtzio Publikoaren 367 Indize Gordina,
Gastu horiek honako kontu honetatik ordainduko dira: 012/641311.
Halatan, honako hau proposatu zaio Herriko Kontseiluari:
- 35 oreneko lanaldi osoko aldi baterako lanpostu horiek erabaki ditzan eta lansaria C1 eskalako indizeen arabera ezarri,
- baimena eman diezaion auzapez jaunari lanpostu horiei loturiko dokumentu oro sina dezan,
AUZAPEZ JAUNAK: NAVARRON andrea.
NAVARRON andreak: lanpostu sortze horren alde bozkatuko dugu, noski, lehenik eta behin, lanpostuen sortzea delako. Baina azken aldian erran genuenari eusten diogu, halere, hau da, ez garela Hondarraitz aldean ordainpeko aparkatzea urte osora hedatzearen alde.
AUZAPEZ JAUNAK: Ea ba, bozka dezagun. Nork onartzen du deliberamendua? Bada aurkako bozik edo abstentziorik? Ez dut halakorik ikusten.
AHO BATEZ ONETSIA –
AUZAPEZ JAUNAK: Eskertzen dizuet. MOUNIOS ADURRIAGA andreak du hitza.
006.2025 zk. DELIBERAMENDUA
GAIA: EZOHIKO DIRULAGUNTZA – “MÉMOIRE VIVE/MEMORIA VIVA” ELKARTEA – COLLECTIF POUR LA MÉMOIRE DES ÉTRANGERS DANS LA RÉSISTANCE EN FRANCE 1940-1945- FRANTZIAN, 1940-1945EAN, ERRESISTENTZIAN ARITU ATZERRITARREN OROITZAPENERAKO TALDEA
TXOSTENGILEA: Michelle MOUNIOS ADURRIAGA and.
MOUNIOS ADURRIAGA andreak :
Delibero honen gaia da EZOHIKO DIRULAGUNTZA bat « MEMOIRE VIVE/MEMORIA VIVA » ELKARTEARI – Frantzian 1940-1945ean, Erresistentzian aritu Atzerritarren Oroitzapenerako Taldea
Collectif pour la Mémoire des Etrangers dans la Résistance en France 1940-1945 (Frantzian, 1940-1945ean, Erresistentzian aritu Atzerritarren Oroitzapenerako Taldea) deiturikoak gure herrian zenbait ekitaldi antolatzea proposatu du Bigarren Mundu Gerlaren amaieraren eta Frantzia eta Europa nazien okupaziotik askatzearen, bai eta presoen zerrategien eta nazismoaren bukatzearen 80. urteurrenaren karietara.
Proiektuaren administrazio- eta diru- kudeaketa «MémoireVive/Memoria Viva» elkarteak hartuko du bere kargu.
Proiektua 2025eko apirileko lehen hamabostaldian eginen da, bereziki apirilaren 18an. Honako izen hau ukanen du «Hendaiako geltokiaren proiektua: espainiar eta portugaldarrak gogoan-Projet de la gare d’Hendaye : A la mémoire des Espagnols et des Portugais».
Honako ekitaldi hauek antolatuko dira:
- Hendaiako Herriaren Oroitzapenen Hiriaren bisita,
- Hendaiako nazioarteko geltokian plaka bat kokatzea geltoki horretan eta, beraz, mugan ibili diren espainiar eta portugaldarren oroitzapenean,
- «Igurika gela, Salle d’attente, Sala da Espera» erakusketaren aurkezpena: iberiar emigratuak geltokian azaltzen dituzten Gabriel Martinez-en argazkiak. Erakusketa hori Akitaniako Museoak uzten du eta Gaztelu Aretoan kokatuko da ekitaldiak irauten duen bitartean,
- Filmen proiekzioa, arratsez, apirilaren 18ko astean:
- «Le long voyage d’Esperanza»,
- «Nous sommes venus»,
- «O salto»,
- Historialariak mahai inguru batean arituko dira 20. mendean Frantzia eta Europara egin ziren iberiar migrazioen historiaz mintzatzen,
- Hendaiako muga zeharkatu zutenen lekukotzak biltzea, «Luso-Jornal» egunkariarekin eta «Mémoire Vive/ Memoria Viva» deitu elkartearekin antolatua,
- Rosa Arburoa Goienetxe historialariaren «Le passage clandestin des Portugais par la frontière du Pays Basque» deitu liburuaren aurkezpena,
- Topaketa Hendaiarekin parezkaturiko hiriekin : Viana do Castelo Portugali dagokionean eta Arguedas Espainia dela eta.
Partzuer anitz elkartuko dira proiektu horren inguruan: Espainiaren eta Portugalen enbaxada eta kontsulatuak, gure Parezkatze Batzordea, Akitania Berriko Eskualdea, Departamendua, Akitania Berri, Euskadi, Nafarroa Euroeskualdea, SNCF konpainiaren zuzendaritza nagusia, Immigrazioaren Historiaren Nazio Museoa, «Itinéraire Liberté Pyrénées» elkartea…
Kontuan hartuz proiektu horren interesa herriarentzat, eta horretan lagundu nahian, «Mémoire Vive/Memoria Viva» elkarteari 800 €ko diru kopurua ematea proposatua da.
Honako hau proposatu zaio Herriko Kontseiluari:
- Onar dezala 800,00 €ko ezohiko dirulaguntza ematea «Mémoire Vive/Memoria Viva» elkarteari,
- Baimena eman diezaiola auzapez jaunari horri loturiko dokumentu oro sina dezan.
AUZAPEZ JAUNAK: Milesker MOUNIOS andrea. Bada galderarik? Ez dut halakorik ikusten. Bozka dezagun. Nork onartzen du? Aurkako bozik, abstentziorik?
AHO BATEZ ONETSIA –
AUZAPEZ JAUNAK: Milesker; Ganix GRABIERES jaunak du hitza.
007.2025 zk. DELIBERAMENDUA
GAIA: NATURA 2000 “FR7200774 – TXINGUDI BADIA” ETA “FR7212013 – BIDASOA ITSASADARRA ETA HONDARRIBIKO BADIA” EREMUEN BERRIZ ERE ALDATZEA
TXOSTENGILEA: Ganix GRABIERES j.
GRABIERES jaunak: Deliberamendu hau Txingudi badian eta Hondarraitz hondartzaren parean dauden bi Natura 2000 guneen eremuaren aldaketa berri bati dagokio.
«Txingudi Badia» (Txingudi), alde batetik, eta beste aldetik «Bidasoa itsasadarra eta Hondarribiko Badia» izendaturiko bi NATURA 2000 guneak hastapenean izendatzerakoan akats bat egin zen herrialde bakoitzaren ur eremua zedarritzerakoan eta Espainiaren administraziopeko muga gainditzen zuen eremua zedarritu zen.
Leku horien kendu beharra dagoenez eta bi gune horiek gure herria ukitzen dutenez, Pirinio Atlantikoetako prefetak eta Atlantikoaren Itsas prefetak eskatu ziguten, 2024ko urtarrilaren 30eko gutun batez, Hendaiako Herriaren iritzia Natura 2000 gune horien eremuak aldatzeari buruz.
2024ko apirilaren 25eko bilkuran, proposatu zitzaizkigun aldaketak onartu genituen. Halarik ere, hondartza zati batean bitan banatua delarik sakoneran eta ez duenez uzten lurgainean zedarritze zehatza egiten, alde batetik, eta, beste aldetik, leku horietako erabileretan kudeaketa koherentearen xerka, deliberamendu hark iradokitzen zuen Natura 2000 bi horien lurreko mugak erraz identifika litezkeen bertako elementu fisikoetara lotzea.
Kontuan hartuz bi gune horietarako proposaturiko muga berriak, deliberamendu honi atxiki eranskinetan ageri bezala,
Kontuan hartuz muga berri horiek kontuan hartzen dutela egin genuen iradokizuna, bi guneetarako honako hauek sartuz:
– hondartzaren goialdea,
– Zokoburuko areamuino guztiak,
Kontuan hartuz orain errazago identifika daitezkeela eta ekologia interesak hobe kontuan hartzeko aukera ematen dutela, leku horietako erabileren kudeaketa koherentziari esker,
Honako hau proposatzen dizuet kide horiek:
Aldeko iritzia eman diezaiegula eremuen proposamenei deliberamendu honi lotu eranskinetan azaldu bezala,
Baimena eman diezaiogula auzapez jaunari horri loturiko dokumentu oro sina dezan.
GRABIERES jaunak: Eta, ados bazarete, Pirinio Atlantikoetako prefetari eta Atlantikoaren Itsas prefetari igorriko diegun aldeko iritziarekin batera, berriz ere azalduko diegu CHINGOUDY moldearen ordez TXINGUDI idatz dadin nahiko genukeela FR72000774 gunearen izendatzeko.
AUZAPEZ JAUNAK: Milesker GRABIERES jauna. Bada galderarik? Ez dut halakorik ikusten. Bozka dezagun. Nork onartzen du? Bada aurkako bozik, abstentziorik?
AHO BATEZ ONETSIA –
AUZAPEZ JAUNAK: Milesker. Laurence BEAUFORT andreak du hitza.
008.2025 zk. DELIBERAMENDUA
GAIA: ARRANTZA PORTUA – 2025EKO TARIFAK
TXOSTENGILEA: Laurence BEAUFORT and.
BEAUFORT andreak: Gabon. Arrantza Portua lanabes publikoaren 2025eko tarifak ezartzeko deliberamendua.
IKUSIRIK Lurralde Kolektibitateen Kode Nagusia, bereziki L.2122-22, 26 artikulua,
IKUSIRIK Portuaren Batzordeak 2024ko abenduaren 13an eman aldeko iritzia,
KONTUAN HARTUZ Hendaiako portu aldearen lanabes publikoko kategoria orori behar zaiola tarifa politika ezarri eta egunera eman behar dela 2024ko tarifen zerrenda,
Hendaiako Herriak, portuaren eremuaren kontzesionarioa den bezainbatean, portuan erabiliko diren tarifak ezartze eta aplikaraztearen ardura du.
Tarifen proposamenak Donibane Lohizune-Ziburuko departamendu portuaren ustiatze sozietateak erabiltzen dituen tarifekin koherentzian egin dira.
Halatan, honako hau proposatu zaio Herriko Kontseiluari:
- Onar ditzala goian aurkeztu eta deliberamendu honi erantsirik diren tarifen erabaki guztiak,
- Baimena eman dezala erabaki berri horiek deliberamendu hau indarrean sartuko den unetik goiti aplikatzeko.
AUZAPEZ JAUNAK: MARTIARENA jaunak du hitza.
MARTIARENA GARAT jaunak: Arratsalde on deneri. Dakizun bezala, auzapez jaun horrek, igoera horren aurka bozkatu nuen portuaren batzordearen azken bilkuran, instantzia horretan ordezkatzen ditudan arrantzaleek hala eskaturik, eta azaldu nuen arazoa ez zela mamia bera, guztiok ulertzen baitugu % 2,5eko goratzea, baizik eta azalarengatik, zeren, egun, arrantzaleak kexu baitira ezin dituztelako ontziak segurtasunez estekatu, ez dituztelako behar dituzten zerbitzuak, eta horregatik erabaki zuten aurka bozkatzea, entzun ditzaten.
Eta arrantzale horien ordezkaria naizenez portuaren batzordean, ez dut arrats honetan bozketan parte hartuko, ni ere arrantzalea bainaiz. Ukitua naizenez, ez dut hanka sartu nahi.
AUZAPEZ JAUNAK: Ongi deritzot.
Portuaren Batzordeak eman du bere iritzia. Berak du erabakia, erranen nuke. Baina ulertzen dizut.
Beste galderarik? Ez? Bozka dezagun, beraz. Nork onartzen du? Bada aurkako bozik? Abstentziorik?
MARTIARENA GARAT jaunak ez du bozketan parte hartu.
ADIERAZI BOZ GUZTIEK ONETSIA –
5 abstentzio: NAVARRON and., LEGARDINIER and., COTINAT and., ARZELUS ARAMENDI j., MANTEROLA j.
AUZAPEZ JAUNAK: Milesker. Chantal KEHRIG COTTENÇON andreak du hitza.
009.2025 zk. DELIBERAMENDUA
GAIA: INGURUMENEAN AZANTZAREN PREBENTZIORAKO PLANA (IAPP-PPBE) ONARTZEA – 4. EPEA
TXOSTENGILEA: Chantal KEHRIG-COTTENÇON and.
KEHRIG COTTENÇON andreak: Ingurumenean azantzaren prebentziorako planaren 4. epea onartzeko deliberamendua dugu hemen. Deliberamendu hau kontseiluaren 2024ko irailaren 25eko bilkuran onartu 137.2024 zk. deliberamenduaren jarraipena da. Deliberamendu hark zenbait eztabaida ekarri zuen eta nork bakoitzak azaldu zituen bere ez ulertuak, bereziki ondoko aireportua kontuan ez hartzeari dagokionean.
Ingurumenean azantzaren prebentziorako planaren gaia gai zerrendara datorkigu berriz ere, beraz, zeren, iragarri genuen bezala, arauak behartzen duen galdeketa publikoa egin baitugu eta, halatan, plana onartu behar dugu orain.
Europar Zuzentarauak («Azantza Zuzentaraua» deitua) Ingurumenean azantzari loturiko eragin kaltegarriak ekidin, saihestu edo murrizteko ikusmolde bateratua ezartzeko xedea du. Europar araudi horrek behartzen du, 5 urtez behin, epe finko batean, azantza mapa estrategikoak prestatzera, bateraturik diren balioztatze metodoen bitartez, bai eta ingurumenean azantza saihesteko planak ere, azantza trabagarrien eraginak saihestu eta, ahal bada, murrizteko. Azantza Zuzentarauaren 4. epearen Azantza Mapa Estrategikoak onartzea 2022ko ekainaren 30erako egin behar zen eta prebentzio planena 2024ko uztailaren 18rako.
Hendaiako Herriak Ingurumenean Azantzaren Prebentziorako Plana (IAPP-PPBE) egin behar du urtean 3 milioitik gorako trafikoa duten bide azpiegituretarako; Planaren helburu nagusia eraikinetan eragiten duten azantza trabagarrien maila apaltzeko xedea du, bai eta erabaki diren neurriak azaldu eta zona lasai gisa identifikaturiko lekuak babesteko.
Prebentzio planaren lehen etapan zerbait egitea komeni duen sektoreen diagnostiko egin da. Horretarako, Pirinio Atlantikoetako Departamenduko laugarren epeko azantza mapa estrategikoak 2022ko uztailaren 04an onartu eta argitaratu ziren,
Bigarren etapan, 10 urtetik hona eginiko eta aitzineko prebentzio planean aipaturiko ekintzen plana ezarri da.
Hirugarren eta azken etapak gure herritarrek jasaten duten azantza apaltzeko ekintzen zerrenda egiteko aukera eman digu, bai eta 2024-2029 aldirako ekintzen programa orokorrean antolatzeko ekintza horiek.
Kontuan hartuz ezen horren egiteko, Hendaiako Herriak deliberamendu honetara erantsiriko Ingurumenean Azantzaren Prebentziorako Planerako proiektuan zerrendaturiko ekintza multzo bat eman duela plantan,
Halatan, herriak 30 herria deiturikoa eman du plantan bere lurretan, herri barnea oinezkoentzat eman du, Metrominutu bat sortu du jendeak oinez ibiltzera bultzatzeko, Euskal Herri-Aturri Mugikortasunen Sindikatuak daraman Moduen Aldatzeko Laguntza Planaren (MALP-PARM) proiektuan parte hartzen du, EHEren Mugikortasun planean lekualdatze molde aktiboen alde modala ahal beste areagotzeko txirrindu azpiegiturak gauzatzen ditu… Zerrenda ez da, noski, ekintza horietara mugatzen.
Halatan, deliberamendu honetara erantsiriko azantzaren prebentzio planaren proiektua jendeartera zabaldu dugu 2 hilabetez (2024ko urriaren 15etik 2024ko abenduaren 15 bitartean, biak barne) eta lege iragarki bat argitaratu Sud-Ouest egunkarian 2024ko irailaren 27an.
Jendeartera zabalduriko erregistroan ez da oharrik egin eta gutunik ez zaio auzapezari igorri aldi horretan,
Halatan, bada, honako hau proposatzen zaizue:
- Onar dezazuela Hendaia Herriaren Ingurumenean Azantzaren Prebentziorako Plana eranskinean datorren bezala,
- Auzapez jaunari agindu diezaiozuela Hendaiako Herriaren Ingurumenean Azantzaren Prebentziorako Plana prefet jaunari igor diezaion, horren gauzatzeko.
AUZAPEZ JAUNAK: Bada galderarik? Ez dut halakorik ikusten. Bozka dezagun. Nork onartzen du deliberamendua? Bada aurkako bozik, abstentziorik?
AHO BATEZ ONETSIA –
AUZAPEZ JAUNAK: Eskertzen dizuet. Bigarren gai bat KEHRIG andrearentzat.
010.2025 zk. DELIBERAMENDUA
GAIA: JOSÉPHINE MOLÉRÈS KARRIKA ITSUAREN IZENDAPENA
TXOSTENGILEA: Chantal KEHRIG-COTTENÇON and.
KEHRIG COTTENÇON andreak: Lurralde Kolektibitateen Kode nagusiaren L.2121-29 artikuluak dio herriko bideen izendatze eta zenbakitzea Herriko Kontseiluaren eskumena da,
Kontuan hartuz Subernoa karrikaren 40 eta 44 zenbakien arteko karrika itsuan eraikin berriak eraikiko direla eta bis eta ter zenbakiak badirela jadanik karrika itsu horretan,
Proposatu da Subernoa karrikaren 40 eta 44 zenbakien arteko karrika itsua Joséphine Molérès karrika itsua izendatzea.
Eztabaida egin eta, honako hau proposatu zaio Herriko Kontseiluari:
- Izenda dezala Subernoa karrikaren 40 eta 44 zenbakien arteko karrika itsua Joséphine Molérès karrika itsua,
- Erabaki horren gauzatzeko agindu oro har dezala edo akta oro sina dezala.
KEHRIG COTTENÇON andreak: Hirigintza eta Lanen Batzordearen azken bilkura agirian irakurri ahal izan duzue halako beste deliberamendu bat hartuko dugula Herriko Kontseiluaren hurrengo bilkuran eta batzordearen hurrengo bilkuran euskarri zerrenda bat landuko dugula hurrengo izendapenetarako balia dezagun, Segurtasunerako eta Delinkuentziaren Prebentziorako Tokiko Kontseiluak eskaini zerrendan oin harturik. Eskertzen dizuet.
AUZAPEZ JAUNAK: Onartzen duzue izendapen hau? Nork onartzen du? Bada aurkako bozik, abstentziorik? Ez dut halakorik ikusten. Milesker.
AHO BATEZ ONETSIA –
AUZAPEZ JAUNAK: Bilkura amaitutzat eman aitzin, Xabi MARTIARENAren galdera bat dugu, azaldu nahi badigu.
GAI ERANTSIA
MARTIARENA GARAT jaunak: Ekosistemak ekologia egoera onean atxikitzea eta bioaniztasunaren eskastearen aurkako jarduna ditugu geure politika publikoen erdi-erdian. Natura 2000ren eragiketa orientabideak eta helburuak, «tokiko ondarea balioan ematea, proiektu eramaileei eta erabiltzaileei behar dituzten tresnak ematea, elkarrizketa laguntzea eta tokiko ekintzetarako hautetsien babesa proposatzea» direnean, koherente dira gure ororenak berreskura eta partekatzeko dugun asmoarekin.
Alabaina, Estatuaren zerbitzuek, tokiko elkarteek egin aholkuei kasu egin gabe, hartu dituzten zenbait erabakik zalantzan jartzen dute gure itsas kulturaren begiramena eta gure eskubideen begiramena, hala usaiek ekarri dituzten eskubideen begiramena, nola den hitzarmeneko 5 herrietako (Hendaia, Urruña, Biriatu, Irun eta Hondarribia) herritarrentzako ainguratoki librea urririk izatearena, nola hitzarmenean diren araudien eta legearen kontrolpean direnen begiramena ere.
Estatuaren zerbitzuek nahi eta iragarri duten hornidura arinen eta ainguratze zona bat sortzea Bidasoaren hitzarmenak dakartzan eskubideak urratzen ditu. Horrez gain, balizko ainguratze zona horrek areagotuko luke ur eremu baten kudeaketa enpresa pribatu baten eskuetan edo interes pribatuen eskuetan uzteko arriskua. Azkenik, ez dugu partekatzen ainguratze baimenak senideen artean transmititzea zalantzan jarri eta amaiarazteko asmoa. Bete-betean gara neurri horien guztien aurka.
Ukituak diren herriak eta Bidasoa itsasadarra erabiltzen duten tokiko elkarteetan bilduriko biztanle, erabiltzaile, eragileek elkargoan egin kudeaketa publikoaren alde gara.
Ainguratze baimenak senitartean transmititzearen alde gara.
Bidasoaren hitzarmena betetzearen alde gara.
Eraso honek arrapostu bateratua merezi du, bai eta, Hendaia mailan, hautetsiak eta elkarteak barnean direla, bateraturiko ahobatezko jarrera ere.
Halatan, bada, auzapez jaun hori, ukituak diren herriak eta Bidasoa itsasadarra erabiltzen duten tokiko elkarteetan bilduriko biztanle, erabiltzaile, eragileek elkargoan egin kudeaketa publikoaren alde eta usaiaz eskuratu eta Bidasoaren hitzarmenean ezarriak diren eskubideak betetzearen alde zara?
AUZAPEZ JAUNAREN ERANTZUNA
AUZAPEZ JAUNAK: Xabi hauteskide hori,
Ez nau egin diguzun galderak batere harritzen, zure taldeak korapilatsua den gai horri buruzko mozioa onar genezan eskatu baitzigun. Ene kabineteburuaren bidez, gaiari buruzko lan bilkura bat proposatu genizuen, baina ez dugu horren erantzunik jaso.
Zehazki erranez, gogora dezagun Txingudi badia dela Estatuak kudeatzen duen Euskal Kostaldeko ainguratoki bakarra. Pertsona Publikoen Jabegoaren Kode Nagusiaren L.2124-5, L.2124-14 eta R.2124-39 eta hurrengo artikuluek diotenez, badian kokaturiko kanpoko ainguratokiak hornidura arinen eta ainguratze zona (ZMEL) batean behar lirateke izan. Izan ere, laket portutik at egiten den laket ontzi ororen ainguratzeak Itsas Jabariaren Erabiltze Baimena behar du. Hala da egun, Estatuak, badian, 10 urtetarako kanpoko ainguratzeei ematen dien Aldi Baterako Erabiltze Baimenekin (izendunak, norbanakoentzat, transmitiezinak).
Hornidura arinen eta ainguratze zona (ZMEL) bat sortzeak ainguratokien ikuspen orokorrerako aukera ematen du eta herri bati edo herri elkargo bati kudeaketa egiteko aukera ematen dio.
Estatuak tokiko eragileen aholkuak kontuan hartu gabe erabakiak hartu dituela aipatu duzu: hori dela eta, Itsasoaren eta Itsasertzaren Zuzendaritzak (DML) Txingudi badian hornidura arinen eta ainguratze zona bat sortzearen egingarritasunari buruzko azterketa bati ekin dio, bai, eta Herriari informazioa eman beharko lioke. Baina oraingoz ez da horretaz ezer erabaki. Hausnarketa garaian da dena.
Hornidura arinen eta ainguratze zona horren gobernantza bideak erabakitzeko herriaren iritzia beharko da eta, gero, lehentasunezko eskubidea ukanen luke herriak horren kudeaketa egin nahiko balu.
Iritzia emateko Estatuaren zain izan gabe, Herria lanaldi bat antolatzen ari da Itsasoaren eta Itsasertzaren Zuzendaritzaren (DML) zerbitzuekin, eta horretan parte har dezazuen proposatu dizuegu orain dela egun gutxi eta berriz ere egiten dizuegu proposamen hori, noski.
Izan ere, toki hauetan elkargainka diren araudien (ingurumenekoa, arrantzakoa, ainguratokiena…) konplexutasuna ikusirik, eta, bestalde, begien aitzinean dut 1959ko uztailaren 14ko hitzarmena eta ez du arrantza besterik aipatzen. Berriz ikus dezakezu, baina jakinen duzu jadanik seguruenik, ez duela ainguratokirik aipatzen.
Funtsezkoa iruditzen zaigu badiaren inguruan jokoan ditugunak ongi ulertzea, erabaki onak hartzen ahalko badugu ororen onerako.
Irun eta Hondarribiko gure auzokoekin mintzatzea funtsezkoa iruditzen zaigu, ura partekaturik baitugu, ororena baita ura. Hemen ez dugu hartuko partekaturiko uraren gaineko moziorik Hondarribia, Irun, Biriatu eta Urruñarekin, besteak beste, mintzatu gabe.
Ahalegintzen gara, beraz, aldi berean, etortzeko diren araudien bilakaerak ezagutzen, haien plantan emateari aitzina hartzen eta gure interes kolektiboak babesten. Testuinguru horretan, erabakiak presaka hartzeak muga liezaguke unea datorrenean esku hartzeko aukera.
Hartuko diren erabakiak kontrolatzeko nahia bete-betean partekatzen dugu eta Herriko Kontseiluarengana joko dugu berriz ere bidean diren hausnarketen nondik norakoen berri emateko.
Horra Xabi errateko nizuna.
Bai, erantzun diezadakezu.
MARTIARENA GARAT jaunak: Zertxobait behartze hori, mozio proposamen hori eta gero ahozko galdera hau denbora arazo batengatik datoz, besterik gabe. Ikusi baitugu Estatuaren zerbitzuak saka ahala saka ari zirela gaiarekin denbora laburrean, epe oso laburretan, eta horrek gaitu gaur kezkatzen, hau da, epeak oso laburrak izateak.
Eta, bide batez, ur eremuan orain normalki indarrean den Pirinioetako Itunak, ororen uraren gainean indarra duenak, dio ezin dela gainean ordenantzarik ezarri. Hartara, gauza da jakitea ea Pirinioetako Itunarekin ados garen ala ez, zeren Pirinioetako Ituna betez gero, ezinen baitira gainerako ordenantzak aplikatu, salbu espainiar itsas marinako komandanteak, Madrilen eta frantziar komandanteak bildu eta akordio bat egiten badute.
Hortik galdera zorrotz hau.
AUZAPEZ JAUNAK: Gogora dezagun berriz ere partekaturiko ura dela, ororen ura. Pirinioetako Ituna bai, ados, baina Itunak hartzen dituen bost hiriak, 1959an bederen, ados jartzera heltzen badira, ez dut ikusten nola frantziar Estatuak eta espainiar Estatuak erran lezaketen hemen gure herriak beste lauren izenean erran genezakeenaz besterik.
Eta berriro ere diot, partekaturiko ura da eta ezin dugu orain erabaki bat hartu erranez, adibidez, “ainguratokien urririkotasunaz eta belaunaldi batek besteari transmititzeaz mintzatuko gara” Hondarribiak erraten badigu “guk ez dugu batere horrela egiten eta ez gatoz horrekin bat”. Zer eginen genuke zein bere Estatuarekiko?
Bilkura garrantzitsu bat eginen da Parisen, batere zerikusirik ez duena batzorde misto prestatzailearekin. Hiruzpalau urtez behin bildu ohi da. Ekainerako da iragarria. Gai zerrendan sar litezkeen gaien artean, eskatu dut aireportuaren eta duen funtzionamenduaren gaia sar dezaten, kezkatzen baigaitu.
Badakit oso litekeena dela diplomaziak gai gaitz hori gai zerrendan ez sartzea erabakitzea. Paris eta Madrilen artean ez haserretzeko bide onena dute hor.
Nolanahi ere den, guk geure egitekoa bururaino eginen dugu, gaur aurkeztu zaigun gutunaz duen usteaz Hendaiako Herriko Kontseiluak dioena kontuan hartuz eta Irun, Hondarribia, Biriatu eta Urruñari beren iritzia galdetuz.
Beste galderarik ez bada, bilkura bukatutzat eman dezagun. Eskertzen dizuet.
Gai zerrenda bururatua zelarik, auzapez jaunak biltzarrari eskerrak eman eta bilkura amaitutzat eman du 19:22 orenetan.
HENDAIAN, 2025eko urtarrilaren 23an
Auzapeza,
Euskal Hirigune Elkargoaren lehendakariordea,
Kotte ECENARRO
HERRIKO ETXEAREN WEBGUNEAN HEDATURIK
2025.01.23an
