2024ko apirilaren 24 asteazkeneko herri kontseiluaren bilkura Bilkura agiria

Réf. KE.IG – 098.2024

Bi mila eta hogeita laugarren urtean, apirilaren 24an, asteazkenarekin, bildu da, 18:30ean, Herri Biltzarra, Kotte Ecenarro auzapezaren lehendakaritzapean.

BERTARATUAK: ECENARRO j. (auzapeza), – KEHRIG COTTENÇON and., TRANCHE j., BUTORI and., IRAZUSTA j., MOUNIOS-ADURRIAGA and., ARRUABARRENA j., GRABIÈRES j. (Auzapezordeak), BERNARD j., AIZPURU and., PELEGRIN-ARAMENDY  j., TARIOL j., BEAUFORT and., LABEAU and., CEZA and., JEHAN j., HARAMBOURE and., EIZAGUIRRE j., ROMAN and., MANTEROLA j., LEGARDINIER and., ARZELUS-ARAMENDI j., NAVARRON and., MARTIARENA-GARAT j., COTINAT and., SALLABERRY j., BARRERO and., ESTOMBA and. 070.2024 zk. deliberamendutik goiti, POUYFAUCON j., BALANZATEGUI j. 068.2024 zk. deliberamendutik goiti, HIRIBARREN and.

AHALORDEAK: TRANCHE jaunak KEHRIG COTTENÇON andreari, CAMACHO-SATHICQ andreak CEZA andreari, BERNARD jaunak TARIOL jaunari, MANTEROLA jaunak LEGARDINIER andreari, DESTRUHAUT jaunak HIRIBARREN andreari.

BILKURA IDAZKARIA: Céline COTINAT and.,

Deialdiaren eguna:   2024ko apirilaren 17

AUZAPEZ JAUNAK: Jaun-andre horiek, hauteskide horiek, agur, bilkura ireki dut.

Azken biltzarrari dagokionean, Céline COTINAT andreak du hitza.

I – 2024KO MARTXOAREN 27KO HERRI KONTSEILUAREN BILKURA AGIRIA ONARTZEA

2024ko martxoaren 27 asteazkeneko bilkuraren agiria Céline COTINAT andreak, bilkura idazkari izendatua izan den bezainbatean, irakurri du.

AHO BATEZ ONETSIA–

Gai zerrendari ekin diote gero:

II – DELIBERAMENDUAK

TXOSTENGILEA: Kotte ECENARRO j. auzapeza

067.2024 – HERRI KONTSEILUAK EMAN AHALMEN ORDEZKARITZAZ AUZAPEZAK HARTU ERABAKIAK

AUZAPEZ JAUNAK:  Herri Kontseiluak eman ahalmen ordezkaritzaz auzapezak hartu dituen erabakien jakinaren gainean izan zaitezten eskatzen dizuet.

Herri Kontseilua jakinaren gainean da. Ez da bozkarik.

068.2024 – “ZERGA BEHATOKI PARTEKATUA” ZERBITZU PARTEKATURA LOTZEA

AUZAPEZ JAUNAK: Euskal Hirigune Elkargoak eta haren parte diren kideek zerga behatoki partekatua dute 2018az geroztik.

Halatan, Euskal Elkargoak ingenieritza eskaintza zabaldu du bere kide diren herrietan tokiko zuzeneko zergetarako eta zuzkiduretarako. Batez ere tokiko zuzeneko zergen gidatzeko tresna bat eskainiz eta Elkargoaren Etxeetan harrera aldiak antolatuz gauzatzen den ingenieritza eskaintza hori Iparraldeko ia herri guztietarako da baliagarri eta gero eta parte hartze handiagoa dute horretan herrietako hautetsiek eta langileek; orain molde zabalago batean antolatzen ari da, auzo diren zenbait herri biltzen dituzten lantaldeen moldean.

Zerga behatoki partekatu horren xedea da herriak tokiko zuzeneko zergaren alorrean laguntzea zerga oinarrien jarraipenari eta fidagarri egiteari dagokienean, bai eta erabakiak hartzen laguntzean eta lege eta arauen aldaketek herrien diru iturrietan duten eraginaren gaineko zaintzan.

2023az geroztik Iparraldean finantza publikoen hurbileko sare berria plantan emateak ekarri du tokiko zergen alorrean gauzatu den ingenieritza eskaintza hori kontuan hartzen duen gutun bat sinatzea Finantza Publikoen Departamendu Zuzendaritzaren eta Euskal Hirigune Elkargoaren artean.

Orain artean formaldu gabe zen zerga behatoki partekatuari dimentsio integratuagoa eman asmoz eta partekatze urraspideari ere ekin zaionez, egoki iruditu zaigu zerbitzu bateratu baten moldean ematea.

Elkargo Kontseiluak, 2023ko abenduaren 9ko bilkuran, «Zerga behatoki partekatua» zerbitzu bateratua sortzearen alde egin du eta zerbitzu horretara lotu nahi diren herriei beraien aldetik ere erabakia har dezaten eskatu die.

Honako hauek proposatu zaizkio Herri Kontseiluari:

  • ONAR DEZALA «Zerga behatoki partekatua» zerbitzu bateratua sortzea; horren kostua Euskal Elkargoak hartuko du bere gain,
  • ONAR DEZALA honi erantsia doan eta Euskal Elkargoaren eta dagozkien herrien arteko zerbitzu horren funtzionamendu printzipioak gidatzen dituen hitzarmena;
  • BAIMENA EMAN DIEZAIOLA auzpaezari hitzarmen hori eta dosier horri loturiko zeinahi dokumentu sina ditzan.

AHO BATEZ ONETSIA–

069.2024 – BIZITEGIEN ETA ENERGIAREN ELKARTASUN FUNTSA – 2024KO PARTE HARTZEA

AUZAPEZ JAUNAK: Bizitegien eta Energiaren Elkartasun Funtsa Departamendu Kontseiluak kudeatzen du eta bizitegi duina eskuratu eta bertan baldintza egokietan mantentzeko diruzko laguntza ekartzeko aukera ematen du. Diruzko laguntza horiek onuradunari eman dakizkioke zuzenean, dirulaguntza edo mailegu moldean.

Onuradunak ura edota argindarra edukitzeko zailtasunak dituztenak dira edota bizitegi egokitua ez duten familiak ere .

Departamendu Kontseilua da funtsaren kudeatzailea eta urtero ezartzen du horretarako diru kopuru bat eta herriei eskatzen die funtsa elika dezaten. Hendaiaren 2024rako parte hartzea 11 680 €koa izanen da:

  • Bizitegietarako:          8176 €
  • Energiarako:               3504 €

Honako hauek proposatu zaizkio Herri Kontseiluari:

  • Onar dezala Herriak Bizitegien eta Energiaren Funtsa goian aipatu kopuruetan elika dezan,
  • Erabaki dezala Departamendu Kontseiluak 2024rako deitu kopuruak funts deialdia jasotzen dugunean ematea.

AHO BATEZ ONETSIA–

070.2024 – HENDAIA TURISMO & MERKATARITZA IMEP –  2023KO JARDUERA AGIRIA ETA FINANTZA KONTUA

AUZAPEZ JAUNAK: Nazio mailan, bai eta Europa mailan ere, hilzorian den testuinguru orokorrean, Hendaiako turismoak lortu du bere irudia kapitalizatzen, Abadia gaztelua bezala, non bisitari kopurua inoizko handiena baita.

2023 urtea «Andaia (bai, A batekin, ez da akatsa) –Oroitzapenen Hiria» proiektuaren abian ematearen sinonimo izanen da, irailerako salmenta hitza sinatzearekin eta 2024ko udan irekitzeko asmoz.

Enpresen Gizarte Ardura (EGA-RSE) dela eta, IMEParen garapen arduratsuaren aldeko engaiamenduak bete omen dira.

Azkenik, abenduan, IMEPak bere 20. kandela ufatuko du…

Lanaldi osoko heinean 20 lanpostu ditu eta 2 M€ko funtzionamendu aurrekontua, zeinetan % 58 autodiruztapena baita (alde batera utziz egonaldi zerga; 2022an baino 5 puntu gehiago), IMEPak bere 2023-2027 garapen eskema gauzatzen dirau.

  • Garapen iraunkor eta arduratsua
    • Giza baliabideetan: proiektu moduaren hedapena (bilkurak eta barne bozketak lan molde zenbaiten zehazteko, formakuntzako 505 oren…),
    • Ingurumenaren begiramenez egin garapena: data day (zerbitzarietatik 221 Go datu kentzea), inprimatze gutxiago (2019: 6,5 T eskuorri; 2023: 5,2 T), «Natura helbidea» gune pilotua ADT64 delakoaren ondoan.
  • Turismo bulegoa – Turismo Kalitate labela eta Turismo & Ahalmen Urritasuna 4 leiho labela –
    • Turismo Kalitate ikuskaritza arrakastaz berritua (188 irizpide aztertuak: % 93,06ko arrakasta),
    • 64 952 bisitari hartuak (2022an baino % 12 gehiago),
    • 21 285 dei sartu dira, hau da, 756 oren komunikazioan,
    • 4881 argibide telefonoz emanik (2022an baino % 27 gehiago),
    • Komunikazio ekintzak Bordelen, Tolosan, Nantesen, Euskadin…,
    • Duodecim agentziarekin izan prentsa harremanek Hendaiari buruzko 143 erreportaia ekarri ditu, hau da, 1,7 M€ko hedabide ondorio Frantziako merkatuan; Olé Company delakoarekin, berriz, Espainiakoan (44 erreportaia; 148.000 €ko ondorioak),
    • 599 825 bisitari hendaye-tourisme.fr, webgunean
    • 61 talde hartuak – NK: 142 038 € (2022an baino % 17 gutxiago )– Mozkin egonkorra: 22 350 €,
    • Erreserben zentrala: 75 837 € (2022an baino % 3 gehiago),
    • 63 609 € NK txartel salmentetan,
    • Argitalpenak: ostatalekuen gidak, zerbitzuen gidak, harrera gidak, etab.
  • Ekitaldiak
    • 150etik gora hitzordu urte osoan zehar antolatuak: lerra eguna, udako gau merkatuak, ondare egunak, Palmondoko merkatua…,
    • IMEPak familientzako helbide gisa sailkatzea bultzatzen du haurren asteekin (738 haur hartuak), asteroko hitzorduekin udan: hondar gazteluen lehiaketa, pilota jokoaren lehen ezagutzak, diskoteka arratsak…,
    • IMEPa partzuergoan aritzen da Herriaren ekitaldien zerbitzuarekin (besteak beste, Itsas Besta) eta Guitaralderekin: 5500 €,
    • Sasoiz kanpo une garrantzitsuak garatzen ere saiatzen gara, tokiko ekonomiaren sostengatzeko, batez ere HKH eta Kirolen udal Bulegoarekin batera Hendaia Trail lasterketa antolatuz (800 parte hartzaile otsailean, zeinetatik heren luze batek dioen lasterketa egunean ostatu eta jatetxeetan kontsumitzen duela) edota zientziaren besta.
  • Merkataritza Bulegoa
    82 merkatarik sostengatzen dituzte diruz Hendaia Merkataritzak abian emaniko ekintzak.

    • Animazioak: merkataritza eragiketa otsailean, Urri Arrosa, Eguberri bestak (zeinetan ibilketa eta merkataritza hamabostaldia) …,
    • Udako merkatua igande goizetan, Errepublika plazan, asteroko animazioekin,
    • Ekonomiaren behaketa,
    • Hostailbideko udal saltokia alokairuan ematea (Ona Ona irekitzea),
    • Lokalean kokatu bi saltzaileak laguntzea «Ene jarduera testatzen dut»,
    • Merkataritza kudeatzaileen eskualdeko lehen mintegia antolatzea,
    • Interfazea merkatariekin Errepublika plazaren antolaketa proiektuaren karietara.
  • Abadia Gaztelu-Behatokia – Kalitate Turismo eta Turismo & Ahalmen Urritasun 4 leiho labelduna –
    • 67 268 bisitari hartuak (parkeaz gain), hau da, 2022an baino % 11 gehiago,
    • Asebetetze galdeketak: 9,12ko nota, 10etik, bisitaren kalitateari dagokionean,
    • Arrasto jokoa haurrentzat,
    • Zientzia lantaldeak haurrentzat, pribatuekin partzuergoan,
    • Ihes-joko mugikor baten garapena.

ESTOMBA andrea biltzarrera bildu da.

2023ko urtealdiaren Finantza Kontua, emaitzaren pasaraztea alde batera utziz, honela ezarri da:

2023ko urtealdiaren Finantza Kontua
Funtzionamendua Inbestimendua
Diru sartzeak orotara 2 024 195,98 € 798 754, 18 €
Gastuak orotara 1 911 905,01 € 719 859,07 €
2023ko emaitza 112 290,97 € 78 895,11 €

Funtzionamendu produktuen aldetik:

  • diru sartze propioak milioi eurotik gorakoak dira (2022an baino % 15 gehiago).
  • Abadia gazteluaren produktuak % 16 emendatu dira.
  • Udalaren dirulaguntza produktuen % 14 da.

Funtzionamendu kargen aldetik:

  • Lansarien kopurua funtzionamendu kargen % 57,71 da (2022an baino 2 puntu gehiago),
  • Karga orokorrak gastuen % 30etik beherakoak dira beti.

2023ko emaitzei esker diruztatzen ahalko dugu, Hendaia Turismo & Merkataritza IMEParen Zuzendaritza Batzordearen deliberamenduari jarraikiz, Andaia-Oroitzapenen Hiria proiektua gauzatzea.

Honako hau proposatu zaio Herri Kontseiluari:

Kontuan har ditzala 2023ko jarduera agiri hau eta diruztapen kontua.

Herri Kontseilua jakinaren gainean da. Ez da bozkarik.

071.2024 – HENDAIA TURISMO & MERKATARITZA IMEP – 2024KO HASTAPEN AURREKONTUA

AUZAPEZ JAUNAK: Berriz ere Hendaia Turismo & Merkataritza IMEPari buruz, orain 2024ko hastapeneko aurrekontua dugu onar dezazuen bozkatzeko.

2023ko urriaren 23ko deialdiari jarraikiz, Hendaia Turismo & Merkataritza IMEParen Zuzendaritza Batzordea 2023ko azaroaren 14an bildu zen 2024ko urtealdirako aurrekontu orientabideen eztabaida egiteko.

2023ko azaroaren 27ko deialdi bati jarraikiz, Hendaia Turismo & Merkataritza IMEParen Zuzendaritza Batzordea 2023ko abenduaren 12an bildu zen eta aho batez onartu zuen 2024ko urtealdirako hastapen aurrekontua.

Horrek erakusten du IMEPak 2023-2027rako turismoaren eta merkataritzaren alde duen garapen estrategia.

Honela osatua da:

  • «Gastuak» atalerako:
    • Andaia-Oroitzapenen Hiria delakoaren lanak (inbestimendua: 1,2 M €) bururatu eta publikoari irekitzea, bi lanpostu iraunkor eta sasoirako postu bat sortuz. Kontularitza funtzio berri horrek 120 318 € eskatuko ditu aurrekontutik,
    • Kargak orokorrean banatuko dira 1/3 karga orokorretan eta % 60 lansarien kopuruan. Kontularitza kapitulu horrek nabarmen eragiten du, Abadia parkearen zaintzan ari diren langile guztiak hartzen baititu bere gain,
    • 2026rako aurreikusi egonaldi zergaren produktuen gutxitzeari aurrea hartzeko (turismorako mublatuen ohe kopuruaren gutxitze nabarmena), IMEPak funtzionamendu gastuak murrizten dirau. Halarik ere, jokatzeko lekuak oso urriak dira eta ekitaldiei eta komunikazioari besterik ezin dira loturik izan.
  • «Produktuak» direla eta:
    • lMEPak ahal beste egiten du duen garapen politika diruztatzeko, bere diru iturri bereak emendatzen saiatuz (gogora dezagun, 2019tik 2023ra, jadanik, produktu horiek %40 emendatu direla eta milioi bateko urteko negozio kopuruaren muga sinbolikoa garaitu dela),
    • Andaia–Oroitzapenen Hiriak 109 000 €ko diru sarrera ekarri beharko luke (uztail hastapenean irekiz gero),
    • Abadiarako sartze eskubideak egituraren diru sartzeen herenetik gora dira.

2024ko funtzionamendu atalaren aurrekontua 2.012 226 €tan orekatzen da (2023an 1.744 362 € izan zirelarik).

2024ko inbestimendu atalaren aurrekontua 129 153 €tan orekatzen da (2023an 98 836 € izan zirelarik).

Honako hau proposatu zaio Herri Kontseiluari:

  • Turismo Kodearen R 133-15 artikuluak agintzen duenari jarraikiz, onar dezala Hendaia Turismo & Merkataritza IMEParen 2024rako Hastapeneko Aurrekontua.

COTINAT andreak: arrazoi profesionalak direla eta ez dut bozkan parte hartuko.

AUZAPEZ JAUNAK: Turismoari loturik den beste inork nahi luke bozkatzetik baztertu?

KEHRIG COTTENÇON andreak: bai, nik.

AUZAPEZ JAUNAK: Halatan, bada, bi pertsonek ez dute bozkan parte hartuko. Gainerakoei bozka dezagun eskatzen diet. Nor da alde, nor aurka, nor abstenitzen da? Milesker.

KEHRIG COTTENÇON eta COTINAT andreek ez dute bozkan parte hartu.

AHO BATEZ ONETSIA–

TXOSTENGILEA: Nicole BUTORI and.

072.2024 – HITZARMENA OBRA LAIKOEN FEDERAZIOAREKIN – OPOR ATALA UFOVAL

BUTORI andreak: Bai, hala da, Obra Laikoen Federazioarekin berritzen dugun hitzarmen hori da. Hondarraitzeko lehen mailako eskolako lanak bururatzeko urtebetez eten ondoren, aurten berriz ere ekinen diogu UFOVAL 74ko oporlekuaren haurrak hartzeari, eta horren egiteko, amaitua zen hitzarmena berritu behar genuen. Deliberamendua hala izan da idatzia.

Obra Laikoen Federazioaren opor atala. Obra Laikoen Federazioak (FOL), opor atala (UFOVAL) tokiko kolektibitateekin hitzarmenez lotu ohi da eskola oporraldietan opor egonaldiak antolatzeko asmoz.

Federazio horrek eta Herriak partekatzen dituzten oporraldi horien heziketa helburuak haurren herritartasuna, burujabetzea eta osotasuna dira. Partzuergo horrek oporrik gabe geratzeko arriskua zuten haurrak oporretara joatea laguntzen du ere.

Oporraldi horiek Hondarraitzeko lehen mailako eskolaren lokaletan proposatzen dira. Herritik kanpoko haurrei eskaintzen zaizkie udako oporretan.

Lankidetza hori hobe egokitzeko asmoz, hainbat urteko (2024ko uztailetik 2029ko abuztu arte) hitzarmen batek zehazten ditu horren baldintzak. Eranskinean atzemanen duzue.

Eskura eman lokalak hitzarmenari loturiko eranskinean zehazturik dira; honako hauek dituzte:

  • 6 ikasgela,
  • Balioaniztun aretoa,
  • Baxera garbigunea,
  • jangela,
  • eskolaren zuzendaritza bulegoa eta ondoko lokala,
  • irakasle gela.

Horren ordainean, federazioa honako hauetara engaiatzen da:

  • Hendaiako Herriaren eskolek FOL 74 federazioak nazio mailan kudeatzen dituen opor zentro orotan egin ezagutza klaseen proiektuak dirutan eta pedagogian laguntzea.
  • Ostatatzearen diruztatzen parte hartzea, parte hartzen dutenen kopuruaren arabera, egonaldiaren luzeraren arabera eta Hendaiako Herriaren eskolekin ezagutza klaseak antolatzeko haien luzatzearen arabera. Elikadura, jarduera eta garraio gastu aldakorrak bakarrik izanen dira eskolaren kargura.
  • % 10ean apaltzea Hendaian bizi diren familiek erosi haur bakoitzaren oporleku egonaldiaren prezioa (garraioaz at) (eskaintza hori hautatu behar da eskola oporraldi bakoitzerako igorriko zaigun haien oporleku eskuorrian).
  • Gure gain hartzea honako gastu hauek:
    • Mantenu eta formakuntza SSI delakoarekin loturik,
    • jariakinak,
    • materialaren higatzea (1.40 € haur bakoitzak egin gau bakoitzeko),
    • informatika materiala uztea.

Hor goiko elementuetan oin hartuz, honako hauek proposatu zaizkio Herri Kontseiluari:

  • ONAR DITZALA hitzarmenaren baldintzak,
  • BAIMENA EMAN DIEZAIOLA auzapez jaunari hitzarmena sina dezan,
  • BAIMENA EMAN DIEZAIOLA auzapez jaunari horri loturiko dokumentu oro sina dezan.

AHO BATEZ ONETSIA–

073.2024 –      OINARRI HITZARMENA HENDAIAKO HERRIAREN ETA IPARRALDEKO MAURICE RAVEL KONTSERBATORIOA ETA IPARRALDEKO ORKESTRA SINFONIKOA DARAMATZAN KONPAINIA AUTONOMOAREN ARTEAN

BUTORI andreak: Oinarri hitzarmena hiru urtetarako da eta haren xedea Herriak eta Euskal Herriko Maurice Ravel Kontserbatorioak eta Iparraldeko Orkestrak daramatzan Konpainia Autonomoak batera dituzten helburuak zehaztea da bakoitzaren parte hartze eta kultura jardueraren moldeak ere zehaztuz.

Kultura Ministerioak ezarri pedagogia orientabide eskemari jarraikiz kontserbatorio baten eta orkestra baten jardunari berezko zaizkion irakaste helburuak eta ikasleen gaitasunak pixkanaka hobetze helburuak kontuan hartuz, Herriak eta Konpainia Autonomoak honako hauek egiteko asmo bateratua adostu dute:

  • Kultura ororen esku jartzen, demokratizatzen, laguntzea,
  • Herriaren kultura bizitza biziago eta anitzago egitea,
  • Herriaren gainerako arte egiturekin elkarlanean aritzea,
  • Arte irakaskuntza ororen esku izan dadin bultzatzea,
  • Kalitatezko irakaskuntza eskaintza anitza garatzea.

Halatan, bada, Hendaiako Herriaren, Maurice Ravel Kontserbatorioaren eta Iparraldeko Orkestraren jardunen arteko lotura sendotzeko asmoz, partzuerren arteko adoste protokolo bat ezarri da Herrian plantan emaniko ekintzen eta irakaskuntzen inguruan.

Oinarri hitzarmen honetatik abiatuz, honako urteroko hitzarmen gehigarri hauek ezarriko dira:

  • Denentzat Gizarte Zentroaren dantza aretoa dantza kontserbatorioari uztea,
  • Musika Kontserbatorioari Varietes zinemagelaren etxazpiko lokalak uztea,
  • Harmoniarena deitu musikarako aretoa uztea,
  • Jean Jaurès eskolako lau gela Musika Kontserbatorioari uztea,
  • Urtero Hendaian proposatuko diren jarduerak, kontzertuak eta klase irekiak zehaztuko dituen partzuergo hitzarmena

Halatan, bada, eztabaida egin eta honako hau proposatu zaio Herri Kontseiluari:

  • Baimena eman diezaiola auzapez jaunari oinarri hitzarmena eta hitzarmen gehigarriak sina ditzan.

AHO BATEZ ONETSIA–

TXOSTENGILEA: Ganix GRABIERES j.

074.2024 – NATURA 2000 EREMUEN MUGEN ALDAKETA – «TXINGUDI BADIA» FR7200774 – «BIDASOA ITSASADARRA ETA HONDARRIBIKO BADIA» FR7212023

GRABIERES jaunak: Bi europar zuzentarauetan oinarrituriko bi ministerio aginduk izendatu dituzte, 2006. urtean, bi Natura 2000 gune horiek eta haietako bakoitzaren eremua zehaztu dituzte.

Lehena Txingudi Badiari dagokio eta Erkidegoaren interesekoak diren habitatak, aberedia eta landaredia babesteko xedearekin eman da. Bigarrenak Txingudi Badia eta Hondarribiko Badia edo Higer Badia ere deiturikoa hartzen ditu, hau da, Hondarraitzeko hondartzaren aitzinekoa, betiere Erkidegoaren interesekoak diren hegazti espezieak bereziki babesteko.

Alabaina, jadanik 18 urte direla zehaztu ziren 2 gune horien eremuetan Espainiaren eskumenen pean nabarmen diren sektoreak sartu ziren. Halatan, bada, sektore horiek ken eta zati handietan elkarren gainean diren bi Natura 2000 zona horiek egokitu behar dira.

Bi gune horiek batera hartuko dituen kudeaketa plan bat prestatzeko lanetan arituz (Kudeaketa plan horrek, Natura 2000ren kasuan, Helburu Dokumentu (HD-DOCOB) du izena), Bioaniztasunaren Frantziar Erakundeak (OFB) eremu horien aldatzeko proposamen bat egin dio Ingurumenaren, Antolamenduaren eta Bizitegien Eskualde Zuzendaritzari (DREAL).

Aldi berean, lehen aipatu kentze horien beharraz baliatuz, DREAL erakundeari egoki iruditu zaio hastapeneko eremuan sartu gabe ziren sektore berriak sartzea, Erkidegoaren interesekoak diren espezieak baitaude horietan, bereziki itsas belar baten, Zostera noltii belarraren, habitatak, Txingudi badian, eta  belatz handiaren eta ubarroi mottodunaren habi egite zonak Bidasoaren itsasadarraren eta Higer badiaren kasuan.

Porposamen horiek direla eta Pirinio Atlantikoetako prefetak eta Atlantikoaren Itsas prefetak Hendaiaren Herriaren iritzia galdegin dute.

Testuingurua ikusirik, Natura 2000 bi gune horietarako proposatu eremu aldaketak onar ditzakegu.

Horren osagarri, eska dezakegu, gainera, bi leku horietara Zokoburuko areamuinoen sektore osoa sar dezaten, bai eta erraz bereizten diren muga fisikoetaraino (horma zolak, harroinak, harmorak edo zuresiak) doazen hondartzaren zatiak ere, bertan ongi nabaritzen diren elementu materialetan oinarritzen den muga izanez gero erabileren kudeaketan koherente aritzea errazagoa baita batez ere hondartzari dagokionean,.

Zehatzago erranez, Txingudi Badiaren FR7200774 gunea dela eta eska dezakegu eremua iparralderantz hedatzeko aukera azter dezaten, Frantzian eta bereziki Atlantikoko kostaldean, gutxi dagoen espezie baten habitata izan litezkeen uharriak babesteko; Savalia savagliaz ari naiz, Batzelonako eta Bernako Hitzarmenen II. Eranskinean sailkaturik dena eta orain dela gutxi gure herriko kostalde parean badela frogatu berri dena.

Halatan, bada, hauteskide horiek, honako hau proposatzen dizuet:

Onar ditzazuen Bioaniztasunaren Frantziar Erakundeak eta DREAL erakundeak proposaturiko ZPS 7212013 eta ZSC FR7200774 zonen eremuen aldaketak,
Igor diezazkiegun aipatu berri ditugun bi aldaketa osagarrien iradokizunak,
Baimena eman diezaiozuela auzapez jaunari horri loturiko dokumentu oro sina dezan.

AHO BATEZ ONETSIA–

TXOSTENGILEA: Michelle MOUNIOS ADURRIAGA anderea

075.2024 – AKITANIA BERRIA-EUSKADI-NAFARROA EUROESKUALDEAREN PROIEKTU DEIALDIRA “KARRIKAN” HAUTAGAITZA DOSIERRA AURKEZTEA

MOUNIOS ADURRIAGA andereak: Delibero honen gaia da AKITANIA BERRIA-EUSKADI-NAFARROA EUROESKUALDEAREN PROIEKTU DEIALDIRA «KARRIKAN» HAUTAGAITZA DOSIERRA AURKEZTEA.

Hendaiako Herriak, Kultura Sailaren bitartez, mugazgaindiko KARRIKAN proiektuan hartzen du parte 2016. urteaz geroztik. Gogora dezagun, KARRIKAN proiektua karrika arteen alorrean aritzen diren (euskaraz edo hitzik gabe) euskal konpainia berri edota erdi profesionalak sostengatzeko plataforma bat da. Lurraldean karrika arteen presentzia garatu eta azkartzeko xedea du.

Plataforma horrek 5 kultura eragile ditu orain euroeskualdearen lurralde osoan banaturik:

  • Bilboko Herriko etxea (Bizkaia) Kalealdia festibalaren bidez
  • Leioako Herriko etxea (Bizkaia) Umore Azoka festibalaren bidez
  • Gasteizko Herriko etxea (Araba) Kaldearte festibalaren bidez
  • Ansoain Herriko etxea (Nafarroa)udako egitarauaren bidez
  • Hendaiako Herriko etxea, Antzerkiaren Maiatza festibalaren bidez

Bai eta kideturik diren beste zortzi gune ere : Arrigorriaga, Iurreta, Lekeitio eta Lezo Herriko etxeak, Gipuzkoako Aldundiaren Dantzagunea dantzasaila, Zirkodomo zentroa, Garaion Sorgingunea egonaldietarako lekua eta Erribera Dantzan festibala.

Horiek guztiak engaiatzen dira urtero konpainiak hautatu eta sorkuntza proiektua gauzatzen laguntzera egonaldien bidez, formakuntza aldien bidez, ikusleekiko topaketekin edota programaren bidez.

2024. urtean KARRIKAN elkartea sortu zen plataformaren lana eta partzuerren, kideturikoen eta artisten arteko harremanak errazteko.

Elkarteak, gidaria den bezain batean, Akitania Berria-Euskadi-Nafarroa Euroeskualdearen «Euroeskualde Herritartasuna» proiektu deialdirako hautagaitza dosierra aurkeztu nahi du 2024-2025erako. Proiektuan diren 5 partzuerrak lotuko lirateke eskari horretara eta horren sinatzaile lirateke.

Hautagaitza horren bidez sendotu dezakete proiektua eta bilakarazi, bai eta bi konpainia sostengatu ahal den laguntza pertsonalizatu onena emanez, kalitatezko lan baldintzak bermatuz eta mugitzeko aukera erraztuz. Sektoreak dituen beharrei hobe erantzun nahiz, bi kategoriatan banatu dira laguntzak : konpainia bat urtebetez da lagundua eta beste bat bi urtez. Horrela eginez, urtero bi konpainia laguntzen ditugu eta, hartara, eraginkorragoa da proiektua.

Hona hemen berrikuntzetako batzuk :

  • Ekologia trantsizioaren gaiak proiektu osoa zeharkatzen du
  • Kideturiko lekua berriak daude
  • Proiektuaren kudeaketarako bulegoa sortzea (elkartea), eko arduran eta jabego intelektualean espezializatua
  • Egile eskubideei eta eko ardurari buruzko gidabana sortzea
  • Karrika arteen sektoreko hitzen hiztegi hirueledunak sortzea

Ikusten ahal duzue aurreikusi den diruztapen plana.

Euroeskualdearen laguntza eskuratuz gero, gidariari emanen zaio osoki : Karrikan elkarteari, eta berak diruztatuko ditu jarduera gehienak. Gehienezko eskuhartze maila aurrekontu osoaren %50 da.

Hendaiako Herria urteroko kopuruarekin engaiatzen da, hau da, 6 000 €, zeinetan 4 500 € proiekturako eta proiektuaren ekintzetarako baitira, eta 1 500 € Kultura Saileko langileek proiektu horretan eman duten lan denbora balioan emateko.

Akitania Berria-Euskadi-Nafarroa Euroeskualdearen proiektu deialdira erantzuteko, honako hau proposatzen zaio Herri Kontseiluari :

  • Onartzea KARRIKAN hautagaitza dosierraren aurkezpena Euroeskualdearen 2024rako «Euroeskualde Herritartasuna» proiektu deialdira, Hendaiako Herria horren partzuer delarik
  • Baimena ematea auzapez jaunari KARRIKAN hautagaitza aurkezteko behar diren dokumentuak sinatzeko
  • Baimena ematea auzapez jaunari KARRIKAN proiektuaren gauzatzeari loturiko edozein dokumentu sinatzeko

Delibero hau baliatu nahi nuke atera berri den 39. Antzerkiaren Maiatzaren egitaraua ezagutzera. Animatzen zaituztet parte hartzera. Baita ere, festibal hau arrakastatsua izan dadin mobilizatzen diren herriko langile guztiak eskertzen ditut.

AHO BATEZ ONARTUA –

076.2024 –  VARIÉTÉS ZINEGELA– 2024ko PREZIOAK

MOUNIOS ADURRIAGA andereak: Delibero honen gaia da “VARIETES” ZINEMAGELAren sartzea – 2024ko TARIFAK finkatzea.

2023ko apirilaren 26ko 064.2023 zk. deliberamenduaren gaia Varietes zinemagelan «Elkartasun zinemaren txartela» eragiketa plantan ematea zen.

Gogoan har ezazue: «Elkartasun zinemaren txartela» prekarietatean direnei zinema saioak urririk eskaintzeko eragiketa da. Zinemaren erabiltzaile batek duen tarifaren (erabiltzen diren tarifak bozkatu ditugunak dira, egun zineman indarrean direnak) araberako txartel bat gehiago eros eta txartel hori zinema gelaren harlekuan uzten du. Elkartasun txartel horiek agerian ematen dira zinemagelan eta erabili nahi dituztenek eska ditzakete eta nahi duten filma ikusteko baliatu.

Eroste prezioa zehaztu gabe genuenez, jendeek txartel bat gehiago nork bere tarifaren arabera erosten zutelarik tarifa desberdinak sortzen ziren.

Errazago egin eta parte hartzea areagotzeko, kultura batzordearen eta prekarietatearen aurkako borrokarako lantaldearen kide diren hautetsiek batera erabaki dute elkartasun txartel horri 4 euroko tarifa bakarra ezartzea.

Proposamena hemen beherean da azaldua (azken-aitzineko lerroan eransteko) :

Delibero honen gaia da “VARIETES” ZINEMAGELAren sartzea – 2024ko TARIFAK finkatzea
Tarifak €
Tarifa osoa ostiral, larunbat eta igandetan 7.00 €
Tarifa murritza astelehen, astearte, asteazken eta ostegunetan 5.50 €
5 saiotarako abonamendu txartelak 25.00 €
10 saiotarako (+1 bat) abonamendu txartelak 50.00 €
14 urtegabeko haurrak, egunero 4.00 €
Gutxieneko dirusartzedunak, ikasleak, langabeak (frogagiria aurkezturik), ahalmen urritasunen bat dutenak (eta laguntzailearentzat urririk)egunero 5,50 €
Ordubetegabeko filma (publiko ororentzako saioa) 3.00 €
Ordubetegabeko filma (eskola saioa) 2.50 €
Kolegioa zineman (eskola saioa) 3.00 €
Eskola zineman (eskola saioa) 2,80 €
Ama eskola zineman (eskola saioak) 2,80 €
Lizeoa zineman 3.00 €
Taldeak (eskolak, oghz….) 3.50 €
Zinema besta 5.00 €
Télérama festibala 4.00 €
Opera/balletak – 14 urtegabekoentzat 12.00 €
Opera/balletak 15.00 €
Enpresa batzordeak / Synergie txartela 4.00 €
Elkarteak, 25 lekutik gora 3,50 €
Elkartasun tarifa: Onura publikoaren ezagutza duten laguntza humanitarioko elkarteak. 25 lekutikgora 3,00 €
Elkartasun txartela (zineman utzia prekarietatean direnen esku) 4,00 €
Urririk: taldeen laguntzaileak, arrats saioetarako eskuhartzaileak, AFCAE sarea, Cinevasion
Gizarte ekintzako edota karitate ekintzako xedea duten elkarteak, Hendaiako ikasle gurasoen elkarteak eta Denentzat Gizarte Zentroa: urtean 4 lekuren mugan, sari gisa erabil ditzaten		 0,00 €

Zinema tarifak noiz edo noiz alda litezke, eragiketa berezietan edota banatzaileek hala eskaturik. Zinemagelari tarifa aldaketa horiek egiteko baimena eman diezaiozuen eskatzenzaizue.

Honako hau proposatzen zaio Herri Kontseiluari :

  • Goian proposatu tarifak ONARTZEA,
  • Auzapez jaunari horiek aplikatzeko BAIMENA ematea, Varietes zinemagelari buruzko deliberamendu hau bozkatzen denetik goiti.

AHO BATEZ ONARTUA –

TXOSTENGILEA: Laurent PELEGRIN ARAMENDY J.

077.2024 –      EZOHIKO DIRULAGUNTZA – BESTA ETA ANIMAZIOEN AURREKONTU GEHIGARRIA

PELEGRIN ARAMENDY jaunak: Anitz urte dira BALEAK ELKARTEA Sagarno Eguna antolatzen ari dela Herriaren laguntzarekin.

Besta ekitaldi horrek tokiko sagarno ekoizleak eta elkarte zenbait ematen ditu ezagutzera eta herritarrei topatzeko eta partekatzeko une bat eskaintzen die gure herri bizitzaren onerako.

Elkarte antolatzaileak herriari laguntza eskatu dio egun horretarako aurrekontua orekatu ahal izateko.

Orain arte, fakturak aurkeztean ematen zitzaien laguntza argiago izan dadin nahi dugunez, hemendik goiti, Herriaren diruzko parte hartzea 1800 euroko dirulaguntza moldean aurreikusiko dugu.

Honako hau proposatu zaio Herri Kontseiluari:

BALEAK ELKARTEAri 1800 euroko ezohiko dirulaguntza ematea.

AHO BATEZ ONETSIA-

TXOSTENGILEA: Jean Michel ARRUABARRENA j.

078.2024 – LAKET PORTUAREN ETA ARRANTZA PORTUAREN EREMUETAN DAUDEN ORDU-DATAGAILUEN EMAITZAK EMATEA

ARRUABARRENA jaunak: Datagailuen emaitza «datagailu» konpainiaren diru sarreren administrazaileak biltzen du. Alabaina, datagailuak laket portuko eta arrantza portuko eremuetan daudenez, horko datagailuetan bildu diren kopuru horiek dagozkien aurrekontu gehigarrietara eraman behar dira.

2023ko urteari dagokionean, diru sartzea 62 144.10 € ZB da laket portuaren kasuan, eta 55 511.10 € ZB arrantza portuaren kasuan, eta diru horiek dagozkien aurrekontu gehigarrietara eraman behar dira.

Aldiz, datagailuen funtzionamendurako gastuak kontuan hartuko dira, hau da, 8447.20 € ZB laket porturako, eta 4223.60 ZB arrantza porturako.

Horiek horrela, honako hauek proposatu zaizkio Herri Kontseiluari:

  • Onar dezala laket portuaren eremuan kokaturiko datagailuen diru sarrerei dagozkien 62 144.10 € ZB eta arrantza portuaren eremuan kokaturiko datagailuen diru sarrerei dagozkien 55 511.10 € ZB haiei ematea,
  • Erabaki dezala 8447.20 € ZB balioko titulu bat ematea laket portuaren kasuan, eta 4223.60 € ZB balioko beste bat arrantza porturako, datagailuen funtzionamendu gastuen ordainez.

AHO BATEZ ONETSIA–

079.2024 – NERABEEN HONDARTZA HARLEKUAREN IREKITZEA ETA TARIFAK – 2024KO UDA

ARRUABARRENA jaunak: Aitzineko urteetan bezala, nerabeentzako (14-17 urte) harleku bat irekiko dugu hondartzan 2024ko uztailaren 8tik abuztuaren 16ra. Egunero proposatuko ditu jarduerak hondartzan bertan edota, batzuetan, beste lekuetan ere, egiteko dutenaren ezaugarrien arabera.

Halatan, bada, gazteen proiektuen arabera, harlekuko animatzaileek goizean jarduerak proposa ditzakete edo kanpaldiak gure herrian edo beste nonahi.

Eguneroko zaintza bi udal animatzailek eginen dute eta gehienez 24 gazte hartu ahalko dira. Zaintza hori eta gazte kopuru hori handiago egin litezke eskaria eginez gero, bertan diren 12 gaztetarako animatzaile bat baldin bada.

Egitura horretara libreki joaten denak hara joateko eskubidea izateko 11 € ordainduko ditu aldi bakoitzeko: uztailaren 8tik 26ra bat, eta uztailaren 29tik abuztuaren 16ra bestea.

Goian aipaturikoak horrela, honako hauek proposatu zaizkio Herri Kontseiluari:

  • Baimena eman diezaiola auzapez jaunari hondartzan nerabeentzako harleku hori 2024ko udarako plantan eman dezan,
  • Erabaki dezala gazte eta aldi bakoitzeko 11 euroko tarifa ezartzea, goian erranik bezala,
  • Baimena eman diezaiola auzapez jaunari horri loturiko dokumentu oro sina dezan.

AHO BATEZ ONETSIA-

080.2024 – FUNTZIONAMENDURAKO DIRULAGUNTZAK ELKARTEEI – AURREKONTU NAGUSIA

ARRUABARRENA jaunak: Elkarteen funtzionamendurako dirulaguntzak 2024ko hastapeneko aurrekontuarekin bozkatu ziren.

Zenbait eskari ezin izan ditugu garaiz bideratu. Hartara, kasu horretan diren elkarteei dirulaguntzak osagarrian ematea proposatu da. Eskariak horretarako batzordeek aztertu dituzte.

Herri Kontseiluari honako dirulaguntza hauek ematea proposatu zaio:

  • 9000 € ENDAIKA
  • 5000 € PAREZKATZE BATZORDEA
  • 3400 € ADIL 64
  • 500 € ON EGIN
  • 300 € PLANETES ECOLES
  • 300 € VMEH PAYS BASQUE
  • 500 € NESK A PAILLETTES
  • 120 € ASSOCIATION FRATERNELLE DES AVEUGLES
  • 2000 € RESTOS DU CŒUR
  • 500 € BAGERA
  • 5000 € ALAIAK

AHO BATEZ ONETSIA–

TXOSTENGILEA: Itziar AIZPURU and.

081.2024 – LANPOSTU IRAUNKORREN 3. TAULA

AIZPURU andreak: 2023ko abenduaren 20ko 197.2023 zk. deliberamenduarekin, Herri Kontseiluak erabaki zuen France Services harrerarako bigarren lanpostu iraunkorra sortzea 2024. urtean zehar; administrazio laguntzaileen alorreko lanpostua da (C kategoria).

Lanpostu hori lurralde idazlarien lanpostu alorrera hedatuko dugu (B kategoria) eta funtzionario bat edo kontratu arrunt bidezko langile bat hartuz bete liteke, funtzio publikoaren kode nagusiaren L332-8 2° artikuluak dioenari jarraikiz.

Honako hauek proposatu zaizkio Herri Kontseiluari:

ERABAKI DEZALA France Services harrera lanpostua lurralde idazlarien alorrera hedatzea (B kategoria)

ZEHAZT DEZALA lanpostu hori funtzionario bat edo kontratu arrunt bidezko langile bat hartuz bete litekeela

BAIMENA EMAN DIEZAIOLA auzapez jaunari dosier horri loturiko dokumentu oro sina dezan eta kontratazioa egin dezan.

AHO BATEZ ONETSIA-

082.2024 – LANPOSTU IRAUNKORREN 4. TAULA

AIZPURU andreak: Zerbitzuen behar eta zereginei arrapostua emateko lanpostu iraunkorrak sortzea proposatu dio auzapezak Herri Kontseiluari.

Lanpostuen taula honela osatuko da:

TABLEAU DES EFFECTIFS DES EMPLOIS PERMANENTS n° 4
Lanpostua Loturiko gradua(k) Hierarkia kategoria(k) Asteko batezbesteko lanaldia Kontratatzearen oinarria kontratu arruntaz kontratatuz gero
DSI aplikazio edo administrazio erreferente Lanpostu alorrak: Lurralde idazlari edo teknikariak B Lanaldi osoa Funtzio publikoaren kode nagusiaren L 332-8 2° artikulua
Segurtasunerako & gaizkintzaren prebentziorako tokiko batzordearen koordinatzailea (SGPTB-CLSPD) Lanpostu alorra: Lurralde idazlariak eta administrazio laguntzaileak C edo B Lanaldi murriztua 17.30 h astean

Lanpostu horiek funtzionario batek behar ditu bete.

Lanpostuaren hutsunea funtzionario batek beteko ez balu, funtzio publikoaren kode nagusiaren L.311-1artikuluak ezarri printzipio orokorrak baitio legezko agindu batek dispentsa eman ezean, departamenduen, herrien eta administrazio izaera duten haien erakunde publikoen lanpostu zibil iraunkorrak funtzionarioek betetzen dituztela, hala izan ezean, beraz,

Dispentsa egin eta kontratu arruntaz kontratatuko da langile bat, funtzio publikoaren kode nagusiaren L.332-8 2° artikuluak agindurikoa betez, lanpostu iraunkorretarako kontratu arrunt bidezko kontratazioak egiteko baimena ematen baitu zereginen izaerak edota zerbitzuaren beharrek horretarako aukera ematen badute eta funtzionariorik ezin izan bada kontratatu, ez lekualdaketa bidez ez eta lehiaketa gainditu dutenen artean.

Lan kontratuak gehienez hiru urterako dira, gehienez sei urte arte luza litezkeenak hala aginduz gero. Sei urte horiek igaro eta kontratua berrituko balitz, erabakia adierazi behar da eta mugagabe luzatzen da.

Langilea kontratu arrunt bidez kontratatuz gero, lanpostua lehen aipatu lanpostuen mailako indizeen erreferentziarekin kalkulatuko zaio tratamendua.

Lansaria kontratatu denaren diploma mailaren, lanbidean duen esperientziaren eta kalifikazioaren arabera finkatuko da.

Lansarian sartuko dira Herri Kontseiluaren 2022ko otsailaren 23ko deliberamenduan aurreikusi ziren sari eta kalteordainak.

Honako hauek proposatu zaizkio Herri Kontseiluari:

  • ERABAKI DEZALA lehen aipatu lanaldi osoko eta lanaldi murriztuko lanpostu iraunkorren  sortzea 2024ko ekainaren lehentik goiti,
  • ZEHAZT DEZALA  lanpostu iraunkorrak funtzionario bat edo kontratu arrunt bidezko langile bat kontratatuz bete litezkeela
  • BAIMENA EMAN DIEZAIOLA auzapez jaunari dosier horiei loturiko dokumentu oro sina dezan eta kontratua egin dezan.

AHO BATEZ ONETSIA-

083.2024 – 2024KO TURISMO SASOIA – SASOIRAKO LANPOSTUEN SORTZEAK

AIZPURU andreak: 2024ko uda sasoia baldintza onenetan antolatzeko aldi baterako zenbait lanpostu sortu behar dutela erran die auzapezak herri kontseilariei.

Kontuan hartuz funtzio publikoaren kode nagusiaren L. 332-23 2 artikuluak baimen ematen duela, aldi baterako diren lanpostuetan, kontratu arrunt bidezko kontratuak egiteko, sasoian jarduna emendatu delako, gehienez sei hilabeterako hamabi hilabeteko aldi jarraitu batean, kontratuaren berritzea barne.

Honako lanpostu hauek sor ditzazuen proposatzen zaizue; funtzio publikoaren tratamendu indize txikienarekin ordainduak izanen dira:

  • ABADIA EREMUAren zaintza eta mantentzea:
    • 2 lanpostu: lanaldi osoko sasoilaria, uztailaren lehenetik 31 bitarterako
    • 2 lanpostu: lanaldi osoko sasoilaria, abuztuaren lehenetik 31 bitarterako
  • Asporotsttipi euskal etxearen harlekua – ABADIA:
    • 2 lanpostu: lanaldi osoko sasoilaria, ekainaren lehenetik irailaren 30 bitarterako
  • BIZI INGURUNEA ETA GARAPEN IRAUNKORRAREN SAILA
    • 12 lanpostu: lanaldi osoko sasoilariak, ekainaren lehenetik 30 bitarterako,
    • 19 lanpostu: lanaldi osoko sasoilariak, uztailaren lehenetik 31 bitarterako,
    • 19 lanpostu: lanaldi osoko sasoilariak, abuztuaren lehenetik 31 bitarterako
    • 12 lanpostu: lanaldi osoko sasoilariak, irailaren lehenetik 30 bitarterako,
  • UDAL LANTEGIEN SAILA
    Logistika, Bestak eta Ospakizunen Zerbitzua

    • lanpostu 1: lanaldi osoko sasoilaria, ekainaren lehenetik 30 bitarterako,
    • lanpostu 1: lanaldi osoko sasoilaria, uztailaren lehenetik 31 bitarterako
    • lanpostu 1: lanaldi osoko sasoilaria, abuztuaren lehenetik 31 bitarterako,
    • lanpostu 1: lanaldi osoko sasoilaria, irailaren lehenetik 30 bitarterako,
  • AdministraZio OROKORRA etA ARAUDIAK ZERBITZUA
    Handi-plage :

    • 5 lanpostu: lanaldi osoko sasoilariak, uztailaren lehenetik abuztuaren 31 bitarterako,
      «HANDI-PLAGE» hornikuntzara joaten diren ahalmen urriko pertsonak hartzeaz ardura daitezen,
  • HIRI BIZITZA SAILA
    • «Variétés» zinemagela
      • lanpostu 1: lanaldi osoko sasoilaria, uztailaren lehenetik 31 bitarterako,
      • lanpostu 1: lanaldi osoko sasoilaria, abuztuaren lehenetik 31 bitarterako,
    • Gaztelu Aretoa
      • lanpostu 1: lanaldi osoko sasoilaria, uztailaren lehenetik 31 bitarterako,
      • lanpostu 1: lanaldi osoko sasoilaria, abuztuaren lehenetik 15 bitarterako,
    • Gazteria eta Animazio Zerbitzua
      • 15 lanpostu: lanaldi osoko sasoilariak, uztailaren lehenetik 31 bitarterako,
      • 14 lanpostu: lanaldi osoko sasoilariak, abuztuaren lehenetik 31 bitarterako,

Halatan, bada, eztabaida egin eta honako hauek proposatu zaizkio Herri Kontseiluari:

ERABAKI DEZALA

  • Goian aipatu aldi baterako lanpostuak sortzea,
  • Lansaria C1 mailaren indizeen arabera finka dezala,

BAIMENA EMAN DIEZAIOLA

  • Auzapez jaunari lanpostu horiei dagozkien dokumentuak sina ditzan,

ZEHAZT DEZALA

  • Gastu hori aurrekontuan sartuko dela, 012 kapituluan, 64131 artikuluan.

AHO BATEZ ONETSIA-

TXOSTENGILEA: Chantal KEHRIG COTTENÇON and.

084.2024 – SAGEC DELAKOAK ETA BIZITEGIEN 64 ERAKUNDEAK DARAMATEN “ITSAS TALAIA” PROIEKTUAREN OREKA DIRULAGUNTZARAKO PARTE HARTZE HITZARMENA AURKEZTEA

KEHRIG COTTENÇON andreak: SAGEC erakundeak eta Office 64 de l’Habitat bizitegi lagunduen alokatzaileak daramaten «ITSAS TALAIA» proiektuaren harira, 10 569 m² zabal den lursail batean higiezinen multzo bat sortzea da aurreikusia.

Proiektua kadastran honela seinalaturik diren lursail hauetan da egitekoa:

  • AO 200 zk., azalera: 8233 m², Office 64 de l’Habitat deitu erakundeak 2022ko azaroaren 3an erosia, hirian lehentasunez erosteko eskubidearen eskuordetze batez baliatuz, erosi ere 2.500 000 eurotan zerga gabe (Erosketa OFFICE 64 delakoaren administrazio kontseiluaren 2022ko urriaren 20ko deliberamendu batek balidatu zuen).
  • AO 590 zk., azalera:  2336m² SAGEC erakundearen dena.

Eraikitze proiektuak hainbat eraikin aurreikusten ditu, proiektua osorik hartuz orotara hirurogei bat bizitegirekin. Office 64 de l’Habitat erakundeak A eraikina eraikitzearen zuzeneko obralaritza eginen du. Alokatzeko 31 bizitegi lagundu ditu, 16 Laguntza Emateko Alokairu Maileguarekin (LEAM-PLUS) eta 15 Gizarteratzeko Alokairu Mailegu Lagunduarekin (GAML-PLAI), zeinetan 14 T2 baitira, 15 T3 eta 2 T4.

Egungo lursail banaketa ez dator bat proiektuari loturik eginen den zatikako banaketarekin. Eragileen arteko lur salmenta egin beharko da lurren trukea egin eta ordaina emanez.

Hendaiako Herriari eskatu zaio proiektuaren diruztapenean parte har dezala; oinarrizko prezioa, orotara, 7.214 174 eurokoa da (SAGEC zatiak eta OFFICE 64 zatiak barne).

OFFICE 64 zatiari dagokionean, programarako aurrekontu osoa 2.185 006 eurokoa da, hau da, 70 484 euro bizitegi bakoitzeko batez beste.

Herriak eraikitzen diren alokairurako bizitegi lagunduen diruztatzen parte hartzea proposatzen du, 300 000 euroko oreka dirulaguntza baten bidez. Dirulaguntza horretarako kopurua SRU legearen ondorioz eta Hendaia Herriak betetzen ez duelako urtero ordaindu behar ditugun isunetatik kenduko dugu.

Halatan, bada, eztabaida egin eta honako hauek proposatu zaizkio Herri Kontseiluari:

  • Balida dezan OFFICE 64 DE L’HABITAT erakundeari 300 000 euroko oreka dirulaguntza emateko printzipioa ITSAS TALAIA deituko den etxe multzorako PC 06426019B0028 eraikitze baimenaren proiektuaren harira,
  • Baimena eman diezaiola auzapez jaunari oreka dirulaguntza horren emateko aukera emanen duen partzuergo hitzarmena sina dezan.

AHO BATEZ ONETSIA–

  • 085.2024 – BEREKOETXEA ETXEAREN BERRIZTAPENERAKO ALOKANTZA KONTRATUAREN SINADURA SOLIHA ETA LTEP-EPFL ERAKUNDEEKIN

KEHRIG COTTENÇON andreak: Auzapezak Herri Kontseiluari erran dio ezen, 2020ko azaroaren 20ko funts jarduera baten hitzarmen baten bitartez, Euskal Herriko Lurren Tokiko Erakunde Publikoak (LTEP-EPFL) bakarkako etxe bat (Berekoetxea) erosi zuela, Hendaiako Herriaren kontura; Passicot komandantearen karrikaren 23an dago etxea eta kadastran AM 327 seinalaturik da; eraikina berriztatu eta alokairu iraunkorrean jartzeko asmoa da lagunduriko 4 bizitegi hitzartuak eginez:

  • Etxe beherean: T3 bat, 57m2 (alokairu arras lagundua),
  • Lehen solairuan: T4 bat, 81 m2 (alokairu lagundua),
  • Bigarren solairuan: 2 T2, 39 eta 41 m2 (alokairu lagundua).

Auzapezak gogora ekarri du, gainera, berriztatze eta bizitegien egite lan horiek egiteko Euskal Herriko Lurren Tokiko Erakunde Publikoak eta Euskal Herriko SOLIHA elkarteak berriztatze alokantza sinatu dutela Eraikuntzaren eta Bizitegien Kodearen I-.252-1 eta hurrengo artikuluek agindurikoari jarraikiz.

Izan ere, alokantza molde hori bereziki egoki zaio herriaren proiektuari, zeren hartzailea (Euskal Herriko SOLIHA) eraikin horretan lanak egitera engaiatzen baita gero eraikina alokantzan eman dadin.

Berriztatze alokantza hori 40 urtetarako eginen da, Euskal Herriko LTEParen (alokatzailea), Hendaiako Herriaren (azken alokatzailea) eta Euskal Herriko SOLIHA (hartzailea) elkartearen artean sinatzen denetik.

Hendaiak egintzan eskuhartu behar du, bera izanen baita eraikinaren jabea Euskal Herriko LTEPak atzera ematen dionean.

Alokantza euro sinboliko baten bitartez baietsi eta onartuko da.

Halatan, bada, auzapezak Herri Kontseiluari eskatu dio baimena eman diezaiola egintza horretan eskuhartzeko AM 327 seinalaturik den eraikinaren gaineko berriztatze alokantza sinatuko denean Euskal Herriko LTEParen (alokatzailea), Hendaiako Herriaren (azken alokatzailea) eta Euskal Herriko SOLIHA (hartzailea) elkartearen artean.

Eztabaida egin eta honako hauek proposatu zaizkio Herri Kontseiluari:

  • ALDEKO IRITZIA EMAN DEZALA goian aipatu printzipioen gainean,
  • BAIMENA EMAN DIEZAIOLA auzapez jaunari egintzan eskuhartu dezan kadastran den eraikin horren gaineko berriztatze alokantza sinatzen denean Euskal Herriko LTEParen (alokatzailea), Hendaiako Herriaren (azken alokatzailea) eta Euskal Herriko SOLIHA (hartzailea) elkartearen artean.

AHO BATEZ ONETSIA–

086.2024 – PORTU ZAHARRAREN BISTALEKUAREN GAINEAN KOKATU PLAZARI JOANES ZUHIGARAITXIPI IZENA EMATEA

KEHRIG COTTENÇON andreak: Gogora dezagun, herriko bideen izenak eta zenbakitzea Herri Kontseiluaren eskumenetan dira, eta biltzar honek, Lurralde Kolektibitateen Kode Nagusiaren  L.2121-29 artikuluak ezarri eskumen horiek baliatuz, deliberamenduen bidez konpontzen ditu herriari dagozkion gaiak.

Herriak Coursic kortsarioa, egiazko izenaz, Joanes Zuhigaraitxipi, ohoratu nahi du.

1643an sortua, Hendaiar kortsario euskalduna zen. Kortsario jardunean, batez ere Atlantiko itsasoan, eginiko balentriek famatu zuten. Espainiar itsasontzien aurkako erasoak egin zituen eta arerio izugarria izan zen ontzidi etsaientzat. Zituen taktika ausartetatik eta itsasoaren ezagutza sakonetik datorkio, nagusiki, ospea. Zituen ausardiak eta temak eman zioten ospea, bai eta ur arriskutsuetan nabigatzeko zuen abileziak ere.

1693an, Groenlandiako itsasora, Spitzberg uhartera, igorri zuten eta garaipena lortu zuen holandar ontzidiaren aurka, ontzi guztiak suntsitu baitzizkien Hartzen Badian. Ternuara igorri zuten gero, ingelesen arrantza kokalekuei eraso egin eta frantziar goletak sasoia bururatu ondoren etxeratzerakoan babesteko; herioz zauritu zuten han, 1694. urtean, ur haietan, itsas gudu batean.

Kortsario horren oroimenez, inaugiratu berri dugun plazari hendaiar kortsario ospetsu horren izena ematea proposatu da.

Halatan, bada, eztabaida egin eta honako hau proposatu zaio Herri Kontseiluari:

  • Portu Zaharraren bistalekuaren gainean den plazari Joanes Zuhigaraitxipi izena eman diezaiola.

ADIERAZI BOZ GUZTIEK ONETSIA –

6 abstentzio: ARZELUS ARAMENDI j., NAVARRON and., LEGARDINIER and., COTINAT and., MANTEROLA j., MARTIARENA GARAT j.

AUZAPEZ JAUNAK: amaitu da biltzarra; milesker.

Bilkura 20:05etan amaitu da.

HENDAIAN, 2024ko apirilaren 25ean

Auzapeza,
Euskal Hirigune Elkargoaren lehendakariordea,
Kotte ECENARRO

HERRIKO ETXEAREN WEBGUNEAN HEDATURIK
2024.04.25ean